मुंबई : विधिमंडळातील ज्येष्ठ नेते दिवंगत गणपतराव देशमुख यांचे स्मरण नव्या पिढीला होत राहावे. यासाठी विधान भवन परिसरात त्यांचा पुतळा उभारावा, अशी भावना विधानपरिषदेत सदस्यांनी व्यक्त केली.

दिवंगत गणपतराव देशमुख हे दोन्ही सभागृहाचे गुरुजी होते. त्यामुळे त्यांच्या कार्याची ओळख करुन देणारे स्मारक व्हावे. यासाठी शासन सकारात्मक असल्याचे मराठी भाषा मंत्री सुभाष देसाई यांनी विधानपरिषदेत (दि. 28)सांगितले.

याबाबत सदस्यांच्या भावना लक्षात घेऊन सभापतींच्या अध्यक्षतेखाली समिती तयार करुन यात सर्वपक्षीय आमदारांचा समावेश करण्यात यावा. गणपतराव देशमुख यांच्या स्मृतींचे जतन करण्यासंदर्भात विचारविनिमय करुन निर्णय घेतला जावा, असे निर्देश सभापती रामराजे नाईक-निंबाळकर यांनी दिले. औचित्याच्या मुद्दाच्या अंतर्गत सदस्य जयंत पाटील यांनी हा विषय उपस्थित केला होता.

गणपतराव देशमुख यांच्या स्मारकाची मागणी समर्थनीय – विरोधी पक्षनेते प्रविण दरेकर 

सन्मानीय सदस्य ज्येष्ठ नेते दिवंगत गणपतराव देशमुख यांचा पूर्णाकृती पुतळा विधिमंडळाच्या परिसरात उभारण्याची मागणी समर्थनीय आहे. विधिमंडळाच्या कामकाजात गणपतराव देशमुख यांचे मोठे योगदान मिळाले आहे. त्यांचे भाषण हे नेहमीच सर्व लोकप्रतिनिधींसाठी दिशादर्शक, व मार्गदर्शक राहिले आहे. विधिमंडळाच्या प्रागणांत जर त्यांचा पुतळा उभारला तर नव्या पिढीतील लोकप्रतिनिधींना, सामाजिक कार्यकर्त्यांना निश्चितच प्रोत्साहन मिळेल, अशी प्रतिक्रिया विरोधी पक्षनेते प्रविण दरेकर यांनी दिली आहे.