नवी दिल्ली : भारतीय महिला कुस्तीपटूंनी कुस्ती महासंघाचे अध्यक्ष ब्रिजभूषण सिंह यांच्याविरोधात लैंगिक शोषणाचे गंभीर आरोप केले आहेत. या प्रकरणी गुन्हा दाखल करण्यात यावा, या मागणीसाठी अनेक महिला कुस्तीपटू तीन महिन्यांपूर्वी दिल्लीत धरणे आंदोलनाला बसल्या होत्या. त्यांना पुरुष कुस्तीपटूंचीही साथ होती. मात्र, तेव्हा दिलेलं आश्वासन अद्याप पूर्ण न झाल्यामुळे पुन्हा एकदा हे कुस्तीपटू जंतर मंतरवर आंदोलनाला बसले आहेत. दरम्यान, यावेळी कुस्तीपटू विनेश फोगाटने भारतीय क्रीडाविश्व आणि त्यातील खेळाडूंना तिखट सवाल केले आहेत.

एका इंग्रजी वृत्तपत्राने याविषयी वृत्त दिले आहे. या सर्व प्रकरणावर कुस्तीपटू विनेश फोगाटने भारतातील आघाडीचे क्रिकेटपटू आणि इतर क्रीडाक्षेत्रातील आघाडीच्या खेळाडूंना परखड सवाल केले आहेत. विनेश फोगाटने आंदोलनाबाबत क्रिकेटपटूंच्या मौनावर तीव्र आक्षेप घेतला आहे. “आख्खा देश क्रिकेटची पूजा करतो. पण या विषयावर आजपर्यंत एकही क्रिकेटपटू बोललेला नाही. आम्ही असं म्हणत नाहीये की तुम्ही आमच्या बाजूने बोला. पण किमान या प्रकरणात ज्या कुठल्या बाजूचं म्हणणं खरं असेल, त्यांना न्याय मिळायला हवा, असा तटस्थ संदेश तरी द्या. मला याचं दु:ख होतंय. मग ते क्रिकेटपटू असोत, बॅडमिंटन खेळाडू असोत, अॅथलिट्स असोत, बॉक्सिंग खेळाडू असोत”, असे विनेश फोगाट म्हणाली.

#WATCH अगर हम सड़क पर बैठे हैं तो हमारी कुछ मजबूरी रही होगी। चाहे खेल मंत्रालय है या IOA किसी ने हमारी नहीं सुनी तब हम जनता के सामने आए हैं कि हमारी कोई नहीं सुन रहा है। पीटी उषा को हम खुद आइकन मानते थे। मैंने उनको फोन भी किया था कि मैं अपना दर्द साझा कर सकूं पर उन्होंने फोन नहीं… pic.twitter.com/NC9048SIxp

— ANI_HindiNews (@AHindinews) April 27, 2023

महिला कुस्तीपटूंच्या आंदोलनाला पाठिंबा न देण्यासाठी इतर खेळाडूंना कसली भीती वाटतेय? असा प्रश्नही विनेश फोगाटने उपस्थित केला आहे. “मी आणि बजरंग पुनियानं अनेक खुली पत्रं लिहिली, व्हिडीओ पोस्ट केले ज्यात इतर खेळाडूंना बोलण्याची विनंती केली होती. पण त्यांना नेमकी कशाची भीती वाटतेय हे आम्हाला माहिती नाही. मी समजू शकते की त्यांना स्पॉन्सरशिप गमावण्याची किंवा ब्रँड एंडॉर्समेंटचे करार मोडण्याची काळजी असेल. कदाचित त्यामुळेच त्यांना आंदोलन करणाऱ्या खेळाडूंशी नाव जोडलं जाण्याची भीती असेल. पण त्याचं मला दु:ख होतंय”, अशा शब्दांत विनेश फोगाटने तिच्या भावना व्यक्त केल्या आहेत.

यावेळी विनेश फोगाटने अमेरिकेतील ‘ब्लॅक लाईव्ह्ज मॅटर्स’ या मोहिमेचाही संदर्भ दिला. “आपल्या देशात मोठे अॅथलिट्स नाहीत असं अजिबात नाहीये. आपल्याकडे अनेक मोठे क्रिकेटपटू आहेत. ब्लॅक लाईव्ह्ज मॅटर्सच्या मोहिमेवेळी या सगळ्यांनी आपला पाठिंबा दर्शवला होता. आम्ही तेवढाही पाठिंबा मिळण्यासाठी पात्र नाही आहोत का?” असा सवालच विनेश फोगाटने उपस्थित केला आहे.