Jitendra Awhad : उदगीर येथील कोविड सेंटरमधील एका डॉक्टरचा अमानवीय ऑडिओ क्लिप व्हायरल झाला आहे, या व्हिडिओमध्ये तो एका मुस्लिम महिला रुग्णास मारून टाकण्याची चिथावणी देत आहे. ही घटना 2021 साली घडली असून, सदर ऑडिओ क्लिप आता समोर आली आहे.

वैद्यकीय पेशाला काळिमा फासणारी ही घटना समोर आल्यानंतर महिलेचे पती दायमी अजिमोद्दीन गौसोद्दीन (रा. आझादनगर, उदगीर) यांनी डॉ. शशिकांत देशपांडे यांच्याविरुद्ध उदगीर शहर पोलीस ठाण्यात तक्रार दाखल केली आहे. त्यावरून डॉ. शशिकांत देशपांडे यांच्यावर शनिवारी गुन्हा दाखल करण्यात आला. दरम्यान, या प्रकरणावर राष्ट्रवादी काँग्रेसचे नेते जितेंद्र आव्हाड यांनी तीव्र संताप व्यक्त केला आहे.

कोरोना काळात रुग्णालयात बेड्सची कमतरता असताना, संबंधित डॉक्टरने आपल्या सहकाऱ्याला ऑक्सिजन जास्त लागतोय म्हणून रुग्णाला मारून टाकण्याची सूचना दिल्याचे ऑडिओमध्ये स्पष्ट ऐकू येते. या प्रकारामुळे वैद्यकीय पेशावर गंभीर प्रश्नचिन्ह उपस्थित झाले आहेत.

जितेंद्र आव्हाड यांनी या प्रकरणी कठोर कारवाईची मागणी केली असून, दोषी डॉक्टरवर तात्काळ कारवाई करण्याची गरज व्यक्त केली आहे. या प्रकारामुळे समाजात संतापाची लाट उसळली आहे.

जितेंद्र आव्हाड यांची पोस्ट काय?

जितेंद्र आव्हाड यांनी म्हटले आहे की, उदगीर येथील नांदेडनाका परिसरातील कोविड सेंटरमधील डॉक्टरांची कोरोना काळातील एक ऑडिओ क्लिप तब्बल पाच वर्षांनंतर उघडकीस आलीय. एक मुस्लिम धर्मीय महिला कोरोनाने अत्यवस्थ असताना त्या रुग्णालयातील बेडच्या संदर्भात बोलताना डॉ. शशिकांत देशपांडे आपल्या सहाय्यक असलेल्या डॉ. शशिकांत डांगे याला म्हणतोय की, कशाला त्या ***चे लाड करतोस… मारून टाक तिला… दुसऱ्या पेशंटला जागा करून दे… तुला ***चा लय पुळका.. यानंतर या दायमी आडनाव असलेल्या मुस्लिम महिलेचा उपचारादरम्यान मृत्यू होतो, असं जितेंद्र आव्हाड यांनी म्हटले आहे.

तसेच पुढे म्हटले आहे कि, ही ऑडिओ क्लिप व्हायरल झाल्यावर त्या दिवंगत मुस्लिम महिलेचे पती अजमुद्दीन गौसुद्दीन दायमी यांनी निर्लज्ज डॉक्टर शशिकांत देशपांडे याच्या विरोधात उदगीर पोलिस स्टेशनमध्ये तक्रार दाखल केली. विशेष म्हणजे अद्याप अटक नाही. ह्या डॉक्टरला पहिलं उचला. असे याने किती जणांचा मर्डर केला आहे हे समोर येऊ द्या. एवढा द्वेष ह्यांच्या मनात असेल तर डॉक्टर कशाला बनलास रे बाबा, करायचा ना आपल्या पूर्वजांचा धंदा, असं म्हणत जितेंद्र आव्हाड यांनी संताप व्यक्त केला आहे.

दोन डॉक्टरांची ऑडिओ क्लिप व्हायरल…

डॉ. शशिकांत देशपांडे आणि डॉ. शशिकांत डांगे यांच्या मोबाइलवर झालेल्या संवादाची ऑडिओ क्लिप सध्या व्हायरल होत आहे. या संवादात डॉ. देशपांडे हे कोविड सेंटरवर कर्तव्यावर असलेले वैद्यकीय अधिकारी डॉ. डांगे यांच्याशी संवाद साधत म्हणतात, नांदेड नाका येथील कोविड सेंटरमध्ये बेड आहेत का?, त्यानंतर डॉ. डांगे बेड उपलब्ध नसल्याचे सांगतात. तेव्हा डॉ. देशपांडे यांनी ‘दायमीच्या पेशंटला मारून टाक की, कशाला ठेवलेय उगीच, ऑक्सिजन जास्त लागतोय, तुम्हाला… लई पडलंय’ असं म्हणून जातीवाचक शब्द वापरतात.