मुंबई – सुदीप्तो सेन यांच्या दिग्दर्शनाखाली बनलेल्या ‘द केरळ स्टोरी’ चित्रपटावरून देशभरात वाद सुरू झाला होता. अजूनही चित्रपटाबाबत सोशल मीडियावर लोक संमिश्र प्रतिक्रिया देत आहेत.

चित्रपटाने बॉक्स ऑफिसवर दमदार कमाईचा आकडा पार केला असून, जवळपास 225 कोटी रुपयांच्या घरात हा चित्रपट पोहोचला आहे. गेल्या महिन्याभरापासून सगळीकडे याच चित्रपटाचा बोलबाला पाहायला मिळत आहे.

आणि म्हणूनच आतापर्यंत ‘द केरळ स्टोरी’ने अनेक विक्रम मोडीत काढले आहेत आणि बॉक्स ऑफिसवर नवीन रेकॉर्ड बनवले आहे. अनेक राज्यांमध्ये बंदी आणि चित्रपटाच्या विरोधात निषेध असूनही, ‘द केरळ स्टोरी’ बॉक्स ऑफिसवर हिट ठरला आहे.

या चित्रपटाबद्दल अनेक राजकीय नेत्यांनी आपल्या प्रतिक्रया दिल्या आहेत. दरम्यान, अश्यातच आता हा चित्रपट लवकरच ओटीटी प्लॅटफॉर्मवर प्रदर्शित करण्यात येणार आहे.

‘द केरळ स्टोरी’च्या हिंदी व्हर्जनचे डिजिटल हक्क झी-5 या ओटीटी प्लॅटफॉर्मने विकत घेतल्याची माहिती समोर येत आहे. त्यामुळे लवकरच हा चित्रपट प्रेक्षकांना झी-5 या ओटीटी प्लॅटफॉर्मवर पाहता येणार आहे.

‘द केरळ स्टोरी’ या चित्रपटात अभिनेत्री अदा शर्मा, योगिता बिहानी, सिद्धी इदनानी आणि सोनिया बलानी यांच्या भूमिका आहेत. दरम्यान, आता हा चित्रपट झी-5 या ओटीटी प्लॅटफॉर्मवर कधी प्रदर्शित होणार आहे. यावद्दल कोणतीही अधिकृत माहिती अद्याप समोर आलेली नाही.