पुणे, {प्रभात वृत्तसेवा} – राज्य मार्ग परिवहन महामंडळ (एसटी) कडून महाकार्गोद्वारे मालवाहतूक सुविधा सुरू केली आणि एसटीला चांगले उत्पादन मिळू लागले. मात्र, एसटीच्या ताफ्यातील गाड्यांची संख्या कमी झाल्यामुळे पुणे विभागात मालवाहतूक गाड्यांची संख्या कमी झाली आहे. त्याचा परिणाम महाकार्गोच्या उत्पन्नावर झाला असून, उत्पन्न निम्म्यावर आले आहे.

कोरोना काळात सर्व वाहतूक ठप्प झाली होती. त्यामुळे आर्थिक अडचणीत असलेल्या एसटी महामंडळाने उत्पन्न वाढविण्यासाठी मालवाहतूक सेवा सुरू केली होती. जुन्या बसचे मालगाडीत रुपांतरित करण्यात आले. त्यामुळे करोना काळात प्रवासी सेवा बंद असताना एसटीची मालवाहतूक सेवा मात्र जोरात सुरू होती, तसेच वाजवी दर, खत्रीशीर सेवा आणि सुरक्षिततेमुळे या सेवेला खासगी आणि सरकारी कंपन्यांकडून मोठ्या प्रमाणात प्रतिसाद मिळत होता.

सुरुवातीला पुणे विभागात ७८ बसद्वारे मालवाहतूक सेवा सुरू होती. त्यामुळे दिवसाला आठ ते नऊ लाख रुपयांचे उत्पन्न मिळत होते; परंतु सध्या केवळ ४१ बसद्वारे मालवाहतूक सेवा सुरू आहे. त्याचा परिणाम उत्पन्नावर होत आहे. परिणामी दिवसाला मिळणार्‍या उत्पन्नात निम्म्याने घट झाली आहे. एकीकडे मालवाहतूक गाड्यांना मागणी आहे. मात्र, बस कमी झाल्याने उत्पन्नात घट झाले आहे, असे एसटी महामंडळाच्या वरिष्ठ अधिकार्‍यांकडून सांगण्यात आले.

परवडणार्‍या दरात सेवा
खासगी मालवाहतुकीपेक्षा एसटीच्या मालवाहतुकीचे दर तुलनेने कमी आहेत. खासगी सेवा ही एकरकमी दर ठरवलेली असते, तर एसटी मालवाहतुकीचा दोनशे किलोमीटर प्रवासासाठी एका किलोमीटरला ५० ते ५५ रुपये दर आकारला जातो. हे दर खासगी मालवाहतुकीच्या दराच्या तुलनेने कमी आहे. त्यामुळे एसटीच्या महाकार्गो सुविधेला चांगला प्रतिसाद मिळतो. त्यामुळे महाकार्गोच्या ताफ्यात गाड्यांची संख्या वाढणे आवश्यक आहे.

अशी आहे आकडेवारी…
वर्ष फेर्‍या कापलेले अंतर उत्पन्न
२०२२-२३ १९२४ ३,१३,३४३ १ कोटी ९१ लाख
२०२३-२४ ८२६ १,२९,०९४ ८७ लाख ३५ हजार