Metro News:  हिंजवडी ते शिवाजीनगर (पुणे मेट्रो लाईन-३) ही महत्त्वाकांक्षी मेट्रो सेवा लवकरच प्रवाशांच्या सेवेत दाखल होणार आहे. येत्या ३ नोव्हेंबरला ऑनलाइन (व्हर्च्युअल) पद्धतीने पंतप्रधान नरेंद्र मोदी यांच्या हस्ते या मेट्रो मार्गिकेचे उद्घाटन करण्याचे नियोजन आहे.

उद्घाटन सोहळा बालेवाडीतील श्री शिवछत्रपती क्रीडा संकुलात होणार असून, मुख्यमंत्री देवेंद्र फडणवीस आणि दोन्ही उपमुख्यमंत्री प्रत्यक्ष उपस्थित राहणार असल्याची माहिती मिळाली.

मात्र, कार्यक्रमाचे स्वरूप आणि प्रवासी सेवा सुरू होण्याबाबत अधिकृत घोषणेची प्रतीक्षा आहे. विधान परिषदेच्या पदवीधर आणि शिक्षक मतदारसंघांच्या निवडणुकीची आचारसंहिता संपल्यानंतर याबाबतची अधिकृत घोषणा होणे अपेक्षित आहे. मेट्रो सुरू झाल्यास हिंजवडी आणि शिवाजीनगरदरम्यान प्रवास करणाऱ्या आयटी कर्मचाऱ्यांचा वेळ वाचण्यासह वाहतूक कोंडी कमी होण्यास मदत होण्याची अपेक्षा आहे.

दरम्यान, या मेट्रोच्या उद्घाटनासाठी अनेक तारखा बदलण्यात आल्या होत्या. विधानपरिषद निवडणुकीच्या आचारसंहितेमुळे कार्यक्रम लांबणीवर पडला होता. आता ३ नोव्हेंबरला कार्यक्रम आयोजित करण्याच्या हालचाली सुरू झाल्या आहेत.

पंतप्रधान मोदींचा पुणे दौरा पुढे ढकलल्याने कार्यक्रम लांबणीवर पडण्याची शक्यता व्यक्त केली जात होती. मात्र, पंतप्रधान व्हर्च्युअल पद्धतीने कार्यक्रमात सहभागी होणार असल्याने नियोजित तारखेलाच उद्घाटन होण्याची शक्यता आहे. Metro News

प्रकल्पाचे प्रमुख वैशिष्ट्ये:
एकूण मार्ग: हिंजवडी ते शिवाजीनगर- २३.२ किलोमीटर (२३ स्थानके)
पहिला टप्पा: सुरुवातीला १७ स्थानकांवरून मेट्रो धावणार
दुसरा टप्पा: उर्वरित ६ स्थानकांचे काम पूर्ण होताच पूर्ण क्षमतेने सेवा सुरू

पुणे महानगर प्रदेश विकास प्राधिकरणाच्या (पीएमआरडीए) माध्यमातून सार्वजनिक-खासगी भागीदारीत माण-हिंजवडी-शिवाजीनगर या सुमारे 23 किलोमीटर लांबीच्या मेट्रो मार्गिकेचे काम करण्यात येत आहे.

माहिती तंत्रज्ञाननगरी हिंजवडी आणि पुणे शहराला जोडणाऱ्या या मार्गिकेवरील प्रवासी सेवा सुरू होण्याची नागरिकांना प्रतीक्षा आहे. या मार्गिकेवरील बहुतांश कामे पूर्णत्वाकडे असून, प्रवासी सेवा सुरू करण्याच्या दृष्टीने आवश्यक प्रक्रिया राबविण्यात येत आहेत. Metro News

हेही वाचा: 

Breast Cancer In Men: पुरुषांनाही होऊ शकतो ब्रेस्ट कॅन्सर! छातीतील ‘या’ बदलांकडे दुर्लक्ष करू नका, वेळीच ओळखा लक्षणे