Maharashtra MLC Election Results 2026:  विधान परिषदेच्या पदवीधर आणि शिक्षकच्या पाच मतदारसंघाच्या निवडणुकीचा आज निकाल लागणार आहे. पुणे, नागपूर, अमरावती, छत्रपती संभाजीनगर या ३ पदवीधर आणि २ शिक्षक मतदारसंघासाठी २३ ऑक्टोबर रोजी मतदान प्रक्रिया पार पडली होती. या निवडणुकीमध्ये ५ जागांसाठी १८२ उमेदवार निवडणुकीच्या रिंगणात उतरले होते.

पुणे पदवीधर मतदारसंघांत सर्वाधिक ४७ उमेदवार रिंगणात होते. औरंगाबाद विभाग पदवीधर मतदारसंघात ४१, नागपूर विभाग पदवीधर मतदारसंघात ३८ उमेदवार निवडणूक लढवत आहेत. अमरावती विभाग शिक्षक मतदारसंघातून २६ आणि पुणे विभाग शिक्षक मतदारसंघातून ३० उमेदवार निवडणूक रिंगणात होते. आता काही तासांत या निकालाचे चित्र स्पष्ट होणार आहे. या मतदारसंघांमधील लढतींमध्ये महायुती आणि महाविकास आघाडीची प्रतिष्ठा पणाला लागली आहे.

किती टक्के मतदान झाले?
नागपूर पदवीधर मतदारसंघाच्या निवडणुकीसाठी ६४.७६ टक्के मतदान झाले. अमरावती शिक्षक मतदारसंघाच्या निवडणुकीसाठी ९१.०८ टक्के मतदान झाले. पुणे पदवीधर मतदारसंघाच्या निवडणुकीसाठी ६२.७८ टक्के मतदान झाले. पुणे शिक्षक मतदारसंघाच्या निवडणुकीसाठी ८५.८७ टक्के मतदान झाले. तर छत्रपती संभाजीनगर पदवीधर मतदारसंघाच्या निवडणुकीसाठी ५८.६७ टक्के मतदान झाले.

कोण कोणाविरुद्ध मैदानात?

• नागपूर पदवीधर मतदारसंघ- महाविकास आघाडीचे विद्यमान आमदार अभिजीत वंजारी आणि महायुतीचे उमेदवार सुधाकर कोहळे
• पुणे पदवीधर मतदारसंघ-  भाजपच्या स्मिता जाधव आणि राष्ट्रवादी काँग्रेस शरदचंद्र पवार पक्षाच्या उमेदवार हर्षदा जाधव
• छत्रपती संभाजीनगर पदवीधर मतदारसंघ- सतीश चव्हाण, दिलीप घुगे आणि प्रतापसिंह पाटील यांच्यात प्रमुख लढत झाली.
• अमरावती शिक्षक मतदारसंघ- किरण सरनाईक, अदिती पोहरे, संगिता शिंदे आणि दत्तात्रय लहाने यांच्यामध्ये लढत झाली.
• पुणे शिक्षक मतदारसंघ-  भाजपचे कौस्तुभ गावडे, शिवसेना शिंदेसेनेचे सचिन सानप, काँग्रेसचे जयंत आसगावकर आणि राष्ट्रीय समाजपक्षाचे दत्तात्रय सावंत यांच्यात चौरंगी लढत झाली.

कुठे होणार मतमोजणी –

• नागपूर पदवीधर मतदारसंघ- मानकापूर क्रीडा संकुल, नागपूर
• अमरावती शिक्षक मतदारसंघ – लोकशाही भवन, अमरावती
• पुणे पदवीधर मतदारसंघ – श्री. शिवछत्रपती क्रीडा संकुल, म्हाळुंगे-बालेवाडी, पुणे
• पुणे शिक्षक मतदारसंघ – श्री. शिवछत्रपती क्रीडा संकुल, म्हाळुंगे-बालेवाडी, पुणे
• छत्रपती संभाजीगर पदवीधर मतदारसंघ – एमआयडीसी, चिकलठाणा

Satara: शिक्षणाशिवाय वडार समाजाची प्रगती होणार नाही;  ना. शिवेंद्रसिंहराजे