The Sabarmati Report | Vikrant Massey : अभिनेता ‘विक्रांत मेस्सी’चा मागील काही दिवसांपासून चर्चेत असलेला ‘द साबरमती रिपोर्ट’ हा चित्रपट 15 नोव्हेंबर रोजी प्रेक्षकांच्या भेटीला आला. हा चित्रपट 2002 मध्ये गोध्रा येथे साबरमती एक्सप्रेसमध्ये घडलेल्या घटनावर आधारित आहे. मात्र या सिनेमाने पहिल्याच दिवशी निराशजनक सुरुवात केली आहे. या चित्रपटाला फारसा प्रतिसाद मिळाला नसल्याचे समोर आले आहे. सात दिवसाच्या बॉक्स ऑफिस कलेक्शनचे आकडे आता समोर आले आहेत. सात दिवसांत सिनेमानं आतापर्यंत केवळ 10 कोटींचीच कमाई केल्याचं म्हटलं जात आहे. गोध्रा घटनेच्या दु:खद घटनेवर आधारित ‘द साबरमती रिपोर्ट’ हा चित्रपट बॉक्स ऑफिसवर कमाल दाखवू शकला नाही. या चित्रपटाची चाहते आतुरतेने वाट पाहत होते. या चित्रपटाकडून लोकांना मोठ्या अपेक्षा होत्या. ट्रेलर रिलीज झाल्यानंतर हा चित्रपट सतत चर्चेत राहिला. पण चित्रपटाची सुरुवात चांगली झालेली नाही. त्यामुळे प्रेक्षक काहीसे नाराज झाल्याचं दिसून आलं आहे. या चित्रपटात विक्रांत मॅसी, रिद्धी डोग्रा आणि राशी खन्ना यांनी पत्रकारांच्या भूमिका साकारल्या आहेत. तर या चित्रपटाची निर्मिती एकता कपूरने केली आहे. पंतप्रधान नरेंद्र मोदी यांनी देखील ट्विट करत सिनेमाचं कौतुक केलं होतं. सॅकनिल्कच्या रिपोर्टुनुसार सिनेमानं सातव्या दिवशी 1.10 कोटींची कमाई केली आहे. सिनेमाचं एकूण कलेक्शन हे आता 11.45 कोटी झालं आहे. चित्रपटानं पहिल्या दिवशी 1.25 कोटी, दुसऱ्या दिवशी 2.1 कोटी, तिसऱ्या दिवशी तीन कोटी, चौथ्या दिवशी 1.15 कोटी , पाचव्या दिवशी 1.3 कोटी आणि सहाव्या दिवशी 1.55 कोटींची कमाई केली होती. दरम्यान, ‘द साबरमती रिपोर्ट’ हा चित्रपट भाजपाची सत्ता असलेल्या सहा राज्यात टॅक्स फ्री झाला आहे. उत्तरप्रदेश हरियाणा, राजस्थान, छत्तिसगड, मध्यप्रदेश, गुजरात या राज्यांमध्येदेखील हा चित्रपट टॅक्स फ्री करण्यात आला आहे. हा चित्रपट गुजरात इथं घडलेल्या गोध्रा हत्याकांडावर बेतला आहे. गोध्रा जळीतकांड आणि त्यानंतर गुजरातमध्ये उसळलेल्या दंगली हा देशाच्या इतिहासातील एक दुर्दैवी घटनाक्रम आहे. त्या वेळी नक्की काय घडलं, या घटना एका पत्रकाराच्या दृष्टिकोनातून मांडल्या आहेत. गोध्रा जळीतकांड आणि त्यानंतरची गुजरातमधली स्थिती याबाबत आतापर्यंत प्रसार माध्यमांमधून सांगण्यात आलेल्या गोष्टीच इथं मांडण्यात आल्या आहेत.
