Political News : महाराष्ट्राच्या राजकीय आणि सामाजिक पटलावर (Political News) तब्बल अनेक दशके आपले अढळ स्थान निर्माण करणारे ज्येष्ठ नेते, ठाकरेसेनेचा महत्त्वाचा चेहरा आणि महाराष्ट्र गुजराती समाज महामंडळाचे अध्यक्ष डॉ. हेमराज शाह यांचे वयाच्या ८४ व्या वर्षी निधन झाले.

मुंबईतील शिवाजी पार्क स्मशानभूमीत त्यांच्या पार्थिवावर अंत्यसंस्कार पार पडले. त्यांच्या पश्चात अरविंद शाह आणि उदय शाह ही दोन मुले, सुना तसेच नातवंडे असा परिवार आहे. त्यांच्या अचानक जाण्याने केवळ (Political News) ठाकरे गटालाच नव्हे, तर अवघ्या राजकीय, सामाजिक आणि सांस्कृतिक क्षेत्राला मोठा धक्का बसला आहे.

केवळ राजकारणातच नव्हे, तर समाजकारण, पत्रकारिता आणि साहित्यविश्वात निःस्वार्थपणे वावरणारे बहुआयामी व्यक्तिमत्त्व म्हणून डॉ. हेमराज शाह संपूर्ण महाराष्ट्राला परिचित होते. मुंबई आणि परिसरातील विखुरलेल्या गुजराती समाजाला एका धाग्यात गुंफण्याचे अभूतपूर्व काम त्यांनी केले.

बृहन्मुंबई गुजराती समाजाच्या माध्यमातून तब्बल १३९ संस्थांचे विशाल फेडरेशन उभारून त्यांनी समाजातील सर्व घटकांच्या अडचणी सोडवण्यासाठी अविरत लढा दिला. ‘कच्छ-शक्ती’ या वार्षिकाचे संपादन करत त्यांनी कच्छी आणि गुजराती संस्कृतीला स्वतंत्र ओळख मिळवून दिली.

साहित्य विश्वातही त्यांचे योगदान थक्क करणारे राहिले. गुजराती, मराठी आणि इंग्रजी या तिन्ही भाषांवर (Political News) त्यांचे विलक्षण प्रभुत्व होते. त्यांनी गुजरातीतील १९, मराठीतील ८ आणि इंग्रजीतील २ पुस्तकांचे अनुवाद केले, तर ३२ गुजराती आणि ४ मराठी ग्रंथांचे कुशल संपादन करून साहित्याची समृद्ध सेवा केली.

महाराष्ट्र गुजराती समाज महामंडळाचे अध्यक्षपद त्यांनी सलग ३५ वर्षे सांभाळले. जोगेश्वरी येथे उभारण्यात आलेले भव्य सात मजली ‘नवनीत गुजराती समाज भवन’ आणि तेथील डॉ. हेमराज शाह स्मृती संग्रहालय त्यांच्या सामाजिक कार्याची सदैव साक्ष देत राहील.

शिर्डी साईबाबा संस्थानचे विश्वस्त, महाराष्ट्र राज्य गुजराती साहित्य अकादमीचे कार्यकारी अध्यक्ष, विश्व गुजराती (Political News) समाज, आणि उमरगाव गोशाळा अशा अनेक संस्थांमध्ये त्यांनी निर्णायक पदे भूषवली. महाराष्ट्रातील इतर मागासवर्गीय (ओबीसी) प्रवर्गात १० विविध जातींचा समावेश व्हावा यासाठी त्यांनी अखेरपर्यंत सातत्यपूर्ण पाठपुरावा केला. पत्रकारितेत निर्भीड स्तंभलेखक म्हणून ओळखल्या गेलेल्या डॉ. शाह यांच्या निधनाने अवघ्या महाराष्ट्रात कधीही भरून न निघणारी पोकळी निर्माण झाली आहे.