चंद्रपूर : चंद्रपूर जिल्ह्यातील राजुरा तालुक्यातील कापणगाव येथे आज सकाळी एका भयानक अपघाताने सर्वत्र हाहाकार माजला आहे. भरधाव ट्रकने विरुद्ध दिशेने येणाऱ्या रिक्षाला जोरदार धडक दिल्याने रिक्षाचालकासह सहा जणांचा जागीच मृत्यू झाला आहे. यात चार महिला आणि दोन पुरुषांचा समावेश असून, तीन जण गंभीर जखमी झाले आहेत.

हा अपघात इतका भीषण होता की, रिक्षा पूर्णपणे चकनाचूर झाली. ट्रक राजुरा येथून खामोना-पाचगावकडे जात असताना, रिक्षा गडचांदूर येथून राजुराकडे येत होती. कापणगावजवळ सर्विस रोडवरून हायवेवर उतरताना हा अपघात घडला. जिल्हा प्रशासनाने मृतकांच्या कुटुंबांना ५ लाख रुपयांच्या मदतीची घोषणा केली असून, पोलिसांनी चालकावर गुन्हा दाखल केला आहे. या घटनेमुळे वाहतूक व्यवस्था विस्कळीत झाली असून, सुरक्षिततेसंदर्भात प्रश्न उपस्थित होत आहेत.

नेमकं काय घडलं

चंद्रपूर-गोंदिया महामार्गावरील कापणगाव (राजुरा तालुका) येथे आज सकाळी सुमारे १० वाजता अपघात घडला आहे. ट्रक राजुरा येथून खामोना-पाचगावकडे मालवाहतुकीसाठी जात होता. तो भरधाव (अंदाजे ८० किमी/तास वेगाने) असल्याने नियंत्रणाबाहेर गेला. दुसरीकडे, रिक्षा गडचांदूर येळून राजुराकडे प्रवाशांसह येत होती. कापणगावजवळ सर्विस रोडवरून मुख्य हायवेवर उतरताना विरुद्ध दिशेने येणाऱ्या ट्रकने रिक्षाला जोरदार धडक दिली.

ही धडक इतकी भीषण होती कि, रिक्षा बाजूला उडून पडली असून तिचा चक्काचूर झाला आहे. पोलिसांनी प्राथमिक तपासात ट्रकचालकाची लापरवाह वाहनचालन आणि वेगमर्यादेचे उल्लंघन असल्याचे सांगितले. अपघातस्थळी स्थानिक ग्रामस्थ आणि पोलिसांनी तात्काळ मदत केली, पण मृत्यू इतके गंभीर होते की, काही जणांना वाचवणे अशक्य ठरले.

प्रकाश मेश्राम (ऑटो चालक, वय ४८/पाचगाव), रवींद्र बोबडे (४८/पाचगाव), शंकर पिपरे (५०/कोची), तनु पिंपळकर (१६ /पाचगाव), ताराबाई पप्पूलवार (५०/पाचगाव) आणि वर्षा मांदाडे (५०/खामोना) अशी मृतांची नावे आहेत. तर गंभीर जखमी झालेल्या तीन जणांना चंद्रपूर येथील जिल्हा सामान्य रुग्णालयात उपचारासाठी दाखल करण्यात आले आहे. तसेच एकजण किरकोळ जखमी झाल्यानं त्याला राजुरा येथील रुग्णालयात दाखल करण्यात आले आहे.