Teacher slaps student – आंध्र प्रदेशतील विशाखापट्टणम येथे एका खासगी शाळेत लहान वर्गामधील विद्यार्थ्याला अपूर्ण गृहपाठाबद्दल शिक्षिकेने थप्पड मारली. त्यानंतर हा विद्यार्थी शिक्षिकेच्या मांडीवर कोसळला. थोड्या वेळातच त्याला जवळच्या रुग्णालयात दाखल करण्यात आले. पण तोपर्यंत त्याचे प्राण गेले होते.

या प्रकरणाच्या तपासाचा भाग म्हणून पोलीस आणि शिक्षण विभागाचे अधिकारी आता सीसीटीव्ही फुटेजची तपासणी करत आहेत. मृत विद्यार्थ्याचे नाव टी. प्रणय तेज असे असून तो वन-टाउन पोलीस ठाण्याच्या हद्दीतील टाउन कोथारोड भागातील एका खाजगी शाळेत शिकत होता.

मुलाच्या पालकांनी आरोप केला आहे की, तो खाली कोसळण्यापूर्वीच्या काही क्षणांचे वर्गातील फुटेज सीसीटीव्हीमध्ये कैद झाले आहे, ज्यामध्ये शिक्षिका त्याला मारताना दिसत आहेत.

त्याच्या पालकांनी सांगितले की, त्या दिवशी सकाळी शाळेत जाण्यास तो अनिच्छुक होता कारण त्याचा काही गृहपाठ अपूर्ण राहिला होता.  ही घटना सकाळी ११ च्या सुमारास घडली, तर कुटुंबाचा आरोप आहे की शाळेने त्यांना दुपारी १२:५० च्या सुमारास याची माहिती दिली.

त्यानंतर नातेवाईकांनी शाळा आणि रुग्णालयाबाहेर जमा होऊन कारवाईची मागणी केली. आंध्र प्रदेशचे शिक्षण मंत्री नारा लोकेश यांनी दोषी व्यक्ती आणि शाळा व्यवस्थापन यांच्यावर कायदेशीर कारवाई करण्याचे आश्वासन दिले आहे.