Tanker Accident – पुणे मुंबई द्रुतगती मार्गावर खोपोली पोलीस ठाण्याच्या हद्दीत पाम तेलाने भरलेला टँकर उलटून त्याला आग लागल्याची घटना शुक्रवारी (दि. २९) दुपारी घडली. अपघातानंतर टँकरच्या केबिनमध्ये चालक अडकल्याने काही काळ घटनास्थळी चिंताजनक परिस्थिती निर्माण झाली होती. मात्र विविध यंत्रणांच्या संयुक्त बचावकार्य राबवून चालकाची सुखरूप सुटका केली.

टँकर (एमएच ०४ केएफ ७६१४) चालक इर्शाद अहमद रहमान (वय २७, रा. बस्ती, उत्तर प्रदेश) हे बंगळूर येथून पाम तेल घेऊन तळोजाच्या दिशेने जात होते. द्रुतगती मार्गावरील मुंबई लेनच्या किलोमीटर क्रमांक ३५.००० येथे दुपारी सुमारे १२.२० वाजण्याच्या सुमारास चालकाचा वाहनावरील ताबा सुटला. त्यामुळे टँकर उलटला आणि टँकरला आग लागली.

खोपोली पोलीस ठाण्याचे पोलीस निरीक्षक सचिन हिरे, महामार्ग वाहतूक पोलीस यंत्रणा तसेच बोरघाटचे सहाय्यक पोलीस निरीक्षक स्वप्नील पाटील यांच्या मार्गदर्शनाखाली बचावकार्य सुरू करण्यात आले. टँकरच्या केबिनमध्ये चालक अडकला होता. त्याला बाहेर काढण्यासाठी खोपोली पोलीस, महामार्ग वाहतूक पोलीस यंत्रणा बोरघाट, बोरघाट टीएपी, आयआरबी पेट्रोलिंग पथक आणि हेल्प फाउंडेशनच्या पथकांनी संयुक्तपणे प्रयत्न केले.

अथक प्रयत्नांनंतर चालकाला सुखरूप बाहेर काढण्यात आले. चालकाला किरकोळ दुखापत झाली असून त्यला पुढील उपचारासाठी एमजीएम हॉस्पिटलमध्ये रवाना करण्यात आले. टँकरला लागलेली आग विझविण्यासाठी खोपोली नगरपरिषद आणि खासगी कंपनीची अग्निशमन यंत्रणा घटनास्थळी दाखल झाली. अग्निशमन दलाच्या अथक प्रयत्नांनंतर आग नियंत्रणात आणण्यात आली.

आयआरबी पेट्रोलिंग पथकाने वाहतूक व्यवस्थापनासह मदतकार्य केले. टँकरमध्ये पाम तेल असल्याने सुरक्षिततेच्या दृष्टीने हेल्प फाउंडेशनचे केमिकल एक्स्पर्ट धनंजय गीध यांना घटनास्थळी पाचारण करण्यात आले. त्यांनी परिस्थितीची पाहणी करून आवश्यक ती कार्यवाही केली. अपघातामुळे मुंबईच्या दिशेने जाणाऱ्या वाहतुकीवर काही काळ परिणाम झाला.