Tamhini Ghat Rain – सह्याद्रीच्या घाटमाथ्यावर वरुणराजाने रौद्ररूप धारण करत रेकाॅर्डब्रेक पावसाची नोंदी केली आहे. १ जून ते ३१ जुलै या दोन महिन्यांत ताम्हिणी घाटात तब्बल ६ हजार मिलिमीटरपेक्षा जास्त पावसाची नोंद झाली असून, या आकडेवारीने देशातील सर्वाधिक पाऊस पडणाऱ्या चेरापुंजीलाही मागे टाकले आहे. ताम्हिणी घाटाची वार्षिक सरासरी ६ ते ७ हजार मिमी आहे.

यंदा ६ ते ८ जुलै दरम्यानच्या ७२ तासांत १,६३५ मिमी पाऊस झाला असून या पावसाने वर्षातील अर्धा कोटा पूर्ण केला आहे. तसेच महाबळेश्वरमध्येही ५ हजार ५०० मिमीसह १२३ वर्षांचा, तर लोणावळ्याने ४ हजार ८०० मिमी पावसासह आपला इतिहास मोडीत काढला आहे. जिल्ह्यातील ताम्हिणी, मुळशी, भिरा, अंबवने, लोणावळा, धावडी या घाट परिसरात पावसाचा जोर अधिक असतो.

ताम्हिणी घाटात दोन महिन्यांत तब्बल ६ हजार मिमीपेक्षा जास्त पावसाची नोंद झाली आहे. येथील वार्षिक सरासरी ६,००० ते ७,००० मिमी आहे. ६ जुलै रोजी ५२५, ७ जुलैला ५३० आणि ८ जुलैला ५८० मिमी असा पाऊस पडला आहे. सातारा जिल्ह्यातील महाबळेश्वरमध्ये जून-जुलैमध्ये एकूण पाऊस ५ हजार ५०० मिलिमीटरवर पोहोचला आहे. ६ जुलै रोजी २४ तासांत तब्बल ५१३ मिमी विक्रमी पाऊस झाला.

हा पाऊस महाबळेश्वरच्या इतिहासातील १२३ वर्षांतील उच्चांकी पाऊस ठरला. ६ ते ८ जुलै दरम्यान महाबळेश्वरमध्ये १ हजार मिमीपेक्षा जास्त पाऊस झाला. लोणावळ्यात ३१ जुलैपर्यंत एकूण ४ हजार ८०० मिमीपेक्षा अधिक पावसाची नोंद झाली. ५ जुलैला ६७०, ६ जुलैला ६२० म्हणजे अवघ्या ४८ तासांत १ हजार २९० मिमी पाऊस पडला. हा लोणावळ्याच्या इतिहासातील सर्वात मोठा पाऊस असून, यामुळे मुंबई-पुणे रेल्वे आणि महामार्गावरील रस्ते वाहतूक काही काळ पूर्णपणे ठप्प झाली.

ताम्हिणीत २८० मिमी पाऊस
पुणे जिल्ह्यातील घाटमाथ्यावर गेल्या २४ तासांत पावसाचा जोर वाढल्याने मुसळधार तर तुरळक ठिकाणे अतिमुसळधार पाऊस झाला. ताम्हिणी घाटात सर्वाधिक २८० मिमी पावसाची नोंद झाली. भिरा येथे २२३, दावडी परिसरात २४९, शिगराव घाट येथे २४० तर अंबवणे परिसरात १६३ आणि लोणावळा येथे १४९ मिमी पावसाची नोंद झाली. शनिवारी दिवसभार पावसाच्या हलक्या ते मध्यम तर तुरळक ठिकाणी जोरदार सरी पडल्या.