तळेगाव दाभाडे – गावकी, लोकप्रतिनिधी आणि प्रशासनाच्या एकमताने घेतलेल्या निर्णयानुसार तळेगाव दाभाडेच्या इतिहासात प्रथमच मानाच्या पहिल्या गणपतीची आरती करून विसर्जन मिरवणुकीला सुरुवात करण्यात आली. सुमारे दहा तास चाललेली मुख्य विसर्जन मिरवणूक उत्साहात पार पडली. तळेगावकरांनी भक्‍तीभावाने आपल्‍या लाडक्‍या बाप्‍पाला निरोप केला.

दुपारी तीन वाजता मानाच्या पहिल्या श्री डोळसनाथ तालीम मंडळाच्या गणपतीची आरती माजी मंत्री संजय भेगडे, नगराध्यक्ष संतोष दाभाडे पाटील, प्रदेश किसान मोर्चाचे माजी अध्यक्ष गणेश भेगडे, ऋषी अरोरा, मुख्याधिकारी गिरीश दापकेकर, मंडळाचे अध्यक्ष सिद्धार्थ भेगडे, किरण ओसवाल, स्थानिक नगरसेवक विनोद भेगडे, तळेगाव दाभाडे शहर पत्रकार संघाचे अध्यक्ष मनोहर दाभाडे, उत्सव समितीचे माजी अध्यक्ष बाळतात्या भेगडे यांच्यासह मंडळाचे कार्यकर्ते व नागरिकांच्या उपस्थितीत करण्यात आली.

या विसर्जन मिरवणुकीत मानाच्या पाच गणपतींसह एकूण २३ गणेश मंडळांनी सहभाग घेतला. सहभागी मंडळांनी पारंपरिक वाद्यांच्या गजरात मिरवणूक काढली. मिरवणुकीच्या मार्गावर ज्येष्ठ नागरिक, महिला आणि बालकांनी मोठ्या संख्येने उपस्थित राहून गणरायाचे दर्शन घेतले. रोटरी क्लब गोल्डन तळेगाव दाभाडेच्या वतीने मिरवणूक मार्गावर थंड पाण्याची व्यवस्था करण्यात आली होती. मुख्य विसर्जन मिरवणुकीत पारंपरिक ढोल-लेझीमचा वापर करण्यात आला. ही मिरवणूक डीजेमुक्त ठेवण्यात आली.

शाळा चौक येथे तळेगाव दाभाडे नगरपरिषदेच्या वतीने स्वागत कक्ष उभारण्यात आला होता. येथे प्रत्येक गणेश मंडळाचे स्वागत करून गणरायाला हार अर्पण करण्यात आला, तर मंडळाच्या अध्यक्षांचा शाल व श्रीफळ देऊन सन्मान करण्यात आला. यावेळी मावळचे आमदार सुनील शेळके, माजी मंत्री बाळा भेगडे, ज्येष्ठ नेते गणेश भेगडे, नगराध्यक्ष संतोष दाभाडे पाटील, मुख्याधिकारी गिरीश दापकेकर यांच्यासह आजी-माजी नगराध्यक्ष, नगरसेवक, पोलीस मित्र संघटना, रोटरी क्लब व विविध संस्थांचे पदाधिकारी उपस्थित होते.

पिंपरी-चिंचवड परिमंडळ चारच्या उपआयुक्त श्वेता खेडकर आणि वरिष्ठ पोलीस निरीक्षक किशोर पाटील यांच्या मार्गदर्शनाखाली मिरवणुकीसाठी चोख पोलीस बंदोबस्त ठेवण्यात आला होता.

Koregaon: कोरेगाव येथे 29 सप्टेंबर रोजी महाकुंभ रोजगार मेळावा, बेरोजगारांनी लाभ घेण्याचे आवाहन