​पिंपरी – दिवाळीत अचानक मोबाइलवर मेसेज येतो की, ‘पंतप्रधान नरेंद्र मोदी यांच्याकडून प्रत्येक भारतीयाला आठ हजार रुपयांची दिवाळी भेट!’ वाचून मन हरखून गेलं ना? पण जरा थांबा! हा कोणताही सरकारी बोनस नसून सायबर भामट्यांनी तुमच्या बँक खात्यावर टाकलेला ‘दरोडा’ आहे.

या आमिषाला भुलून लिंकवर क्लिक केलंत, तर फराळाचा गोडवा संपायच्या आत बँक खात्याचा पार ‘चकनाचूर’ होऊ शकतो, असा इशारा पिंपरी-चिंचवड पोलिसांनी दिला आहे.

सध्या व्हॉट्सॲपवर एका बनावट मेसेजचा महापूर आला आहे. पंतप्रधानांचे नाव आणि फोटो वापरून ‘सरकारी रोख अनुदान मंजूर’ झाल्याचा बनाव केला जातोय.

मेसेजमधील लिंक उघडताच हुबेहूब सरकारी वाटणाऱ्या एका बनावट पेजवर नेले जाते. तिथे तुमचं नाव, बँक खात्याचा तपशील, पॅन कार्ड आणि आधार क्रमांक भरून घेतला जातो.

पुढच्याच क्षणी ओटीपी किंवा यूपीआय पिन विचारून खात्यातील सर्व रक्कम क्षणात लंपास केली जाते.
​सरकारी योजना म्हटली की सर्वसामान्य नागरिक पटकन विश्वास ठेवतात. लोकांचा हाच भोळेपणा सायबर चोरट्यांच्या पथ्यावर पडत आहे.

खूश होऊन अनेकजण हा मेसेज आपल्या नातेवाईक आणि मित्रांनाही फॉरवर्ड करत आहेत; ज्यामुळे नकळत इतरही या जाळ्यात ओढले जात आहेत.

​फसवणूक टाळण्यासाठी ‘हे’ नक्की करा:

• ​कोणत्याही अनोळखी लिंकवर चुकूनही क्लिक करू नका.
• ​बँक तपशील, पासवर्ड, यूपीआय पिन किंवा ओटीपी कोणाशीही शेअर करू नका.
• ​सरकारी योजनांची खातरजमा केवळ अधिकृत संकेतस्थळांवरून (gov.in किंवा nic.in) करा.
• ​खात्री नसलेले मेसेज ग्रुपवर किंवा मित्रांना फॉरवर्ड करणे टाळा.
• ​फसवणूक झाल्यास तातडीने डायल करा ‘१९३०’
• तसेच www.cybercrime.gov.in वर तक्रार नोंदवा

  ‘पंतप्रधानांच्‍या नावे आलेला बोनसचा मेसेज बनावट आहे. त्‍या मेसेजमधील लिंकवर क्‍िलक करू नका. तसेच आपल्‍या बँकेची माहिती किंवा आलेला ओटीपी कोणालाही शेअर करू नका.’ – रोहिदास पवार, पोलीस उपायुक्‍त, गुन्‍हे शाखा.

PCMC News: बाराशे कोटींच्या कर्जाला तूर्तास ब्रेक; स्थायी समितीच्या बैठकीत विषय तहकूब