Aditya Thackeray |  पुण्यातील दीनानाथ मंगेशकर रुग्णालयात भाजपचे विधान परिषद आमदार अमित गोरखे यांचे स्वीय सचिव सुशांत भिसे यांच्या पत्नीचा प्रसूतीदरम्यान मृत्यू झाल्याची दुर्दैवी घटना घडली आहे. गर्भवती असेलल्या तनिषा भिसे यांच्या उपचारांसाठी कुटुंबियांकडून १० लाख रुपयांची मागणी करण्यात आली होती. पण पैशाअभावी वेळेत उपचार न दिल्याने तनिषा यांचा मृत्यू झाल्याचा आरोप त्यांच्या कुटुंबीयांनी केला आहे.

या प्रकरणानंतर राज्यभरात संतापाची लाट उसळून आली आहे. या रूग्णालयाच्या समोर आंदोलने केले जात आहेत. यानंतर आता ठाकरे गटाचे आमदार आदित्य ठाकरे यांनी ‘रुग्णालयातील डॉक्टरांची जात, धर्म न पाहता आरोपी डॉक्टरांवर कारवाई करा’, अशी मागणी केली आहे.

 काय म्हणाले आदित्य ठाकरे ? 

आमदार आदित्य ठाकरे म्हणाले, “पुण्यात दीनानाथ मंगेशकर रुग्णालयामध्ये जो प्रकार घडला तो माणुसकीला काळीमा फासणारा आहे. माणसाच्या जाती-धर्माच्या पलिकडेही माणुसकी नावाची गोष्ट असते. त्यामुळे आरोपींची जात-धर्म न पाहता त्यांच्यावर सरकारने कडक कारवाई करावी. राज्यात मुख्यमंत्री आणि उपमुख्यमंत्री यांचे वेगवेगळे वैद्यकीय कक्ष आहेत. पण याचा उपयोग काय? मुख्यमंत्री कार्यालयातून फोन जाऊनही दखल घेतली नाही. रुग्णालयातील प्रशासन मग्रुर का आहे याचे उत्तर सरकारने द्यावे, असंही आदित्य ठाकरे म्हणाले. Aditya Thackeray |

“मुख्यमंत्री सहाय्यता निधीतून रुग्णालयाच्या प्रशासनाला अनेक फोन गेले. पण कोणाचाही फोन येऊ दे, दहा लाक भरल्याशिवाय अॅडमिट करुन द्यायचे नाही असा आदेश देण्यात आला. हे कृत्य माणूसकीला काळीमा फासणारं आहे. त्यामुळे दीनानाथ मंगेशकर रुग्णालयात घडलेल्या या प्रकरणाची सखोल तपासणी व्हावी आणि रुग्णालयावर कडक कारवाई व्हावी अशी मागणी आदित्य ठाकरे यांनी केली आहे. Aditya Thackeray |

आदित्य ठाकरे म्हणाले की, “काही विषयांवर आम्ही राजकारण टाळत असतो. काल भाजपच्या महिलांनी एका डॉक्टरच्या क्लिनिकवर आंदोलन केले. आम्हीदेखील आंदोलन केले. या राज्यात भाजपचे कार्यकर्तेच सुरक्षित नाहीत. ज्या राज्यात मुख्यमंत्री स्वतःच्या कार्यकर्त्यांना न्याय देऊ शकत नसतील तर नागरिकांनी काय करायचे? या हॉस्पिटलने टॅक्स भरला की नाही माहीत नाही. एक रुपयाच्या भाडेतत्वावर हॉस्पिटल घेतात आणि पुढे काय होते? फडणवीस या हॉस्पिटलवर कारवाई करणार का?”, असा सवालही आदित्य ठाकरे यांनी केला आहे.

देवेंद्र फडणवीसांंनी घेतली भिसे कुटुंबीयांची भेट 

दरम्यान, शनिवार 5 एप्रिल रोजी मुख्यमंत्री देवेंद्र फडणवीस यांनी तनिषा भिसे यांच्या कुटुंबीयांची भेट घेतली आहे. त्यानंतर त्यांनी प्रसारमाध्यमांशी संवाद साधला. तेव्हा फडणवीस म्हणाले, तनिषा भिसे यांच्या कुटुंबीयांची भेट घेतल्यानंतर मी त्यांना आश्वस्त केलेलं आहे, की केवळ या प्रकरणापुरती आपण कारवाई करायची एवढंच मर्यादित नाही. तर पुढे अशी प्रकरणं होऊ नये म्हणून काय काळजी घेतली पाहिजे, या दृष्टीनं आम्ही कारवाई करण्याचा प्रयत्न करत आहोत, असं देवेंद्र फडणवीस म्हणाले. Aditya Thackeray |

“दीनानाथ मंगेशकर हॉस्पिटल हे स्वर्गीय लतादीदी आणि मंगेशकर कुटुंबीयांनी खूप मेहनतीतून उभारलेलं आहे. एक नावाजलेलं हॉस्पिटल आहे. या हॉस्पिटलमध्ये अनेक प्रकारच्या शस्त्रक्रिया आणि उपचार होतात. त्यामुळे सगळं काही चूक आहे असं म्हणण्याचं कारण नाही, पण कालचा प्रकार हा मात्र असंवेदनशीलच होता. जिथे चूक आहे तिथे चूक म्हणावं लागेल, ती चूक सुधारावी लागेल. जर ते सुधारण्याचा प्रयत्न करत असतील, तर मला त्याचा आनंद आहे,” असंही देवेंद्र फडणवीसांनी सांगितले. तसेच दीनानाथ मंगेशकर रुग्णालयातील दोषींवर कठोर कारवाई केली जाईल, असे आश्वासन मुख्यमंत्र्यांनी दिले आहे.

हेही वाचा:  

माणिकराव कोकाटेंनी व्यक्त केली दिलगिरी; म्हणाले “तो शेतकरी माझा मित्र, थट्टा मस्करी…”