T20 World Cup 2024 (IND vs USA) : टीम इंडियाने अमेरिकेचा (USA) 7 विकेटने पराभव करत विजयाची हॅट्ट्रिक केली आहे. या विजयासह संघानं T20 विश्वचषक 2024 स्पर्धेच्या सुपर 8 मध्ये प्रवेश केला आहे. प्रथम फलंदाजी करताना अमेरिकेने 110 धावा केल्या होत्या. प्रत्युत्तरात भारताने 18.2 षटकांत 3 गडी गमावून लक्ष्य गाठले.

लक्ष्याचा पाठलाग करणाऱ्या भारताची सुरुवातही चांगली झाली नाही आणि विराट कोहलीच्या रूपाने संघाने पहिली विकेट गमावली. कोहली खाते न उघडताच बाद झाला. यानंतर सौरभने भारतीय कर्णधार रोहित शर्मालाही पॅव्हेलियनचा रस्ता दाखवला. रोहितने केवळ 3 धावा काढल्या. त्यानंतर अली खानने यष्टिरक्षक फलंदाज ऋषभ पंतला 18 धावांवर बाद करून भारताला तिसरा धक्का दिला. एकेकाळी संघ संकटात सापडलेला दिसत होता, पण सूर्यकुमार आणि शिवमने जबाबदारी सांभाळली आणि भारताला विजयापर्यंत नेले.

भारताकडून सर्वाधिक धावा सूर्यकुमार यादवने केल्या, ज्याने 49 चेंडूत 50 धावा केल्या. त्याने शिवम दुबेसोबत 72 धावांची भागीदारी केली आणि भारताच्या विजयात महत्त्वपूर्ण योगदान दिले. दुबेनेही 31 धावाचे योगदान देत भारताच्या विजयात सहभाग घेतला. अमेरिकेकङून सौरभ नेत्रवलकरने 2 तर अली खानने 1 गङी बाद केला.

तत्पूर्वी, भारताने नाणेफेक जिंकून अमेरिकेला फलंदाजीसाठी आमंत्रित केले परंतु वेगवान गोलंदाज अर्शदीप सिंगने पहिल्याच षटकात अमेरिकेला दुहेरी धक्का दिला ज्यातून संघ शेवटपर्यंत सावरू शकला नाही.प्रथम खेळताना अमेरिकेने 20 षटकांत 8 बाद 110 धावा केल्या होत्या.

कर्णधार मोनांक पटेलच्या अनुपस्थितीतही अमेरिकेच्या फलंदाजांनी ताकद दाखवली. स्टीव्हन टेलरने 24 धावांची महत्त्वपूर्ण खेळी तर नितीश कुमारने 27 धावांची महत्त्वपूर्ण खेळी खेळून संघाला सन्मानजनक धावसंख्येपर्यंत नेले. या दोन फलंदाजांशिवाय ॲरॉन जोन्सने 11 धावा, कोरी अँडरसनने 15 धावा, हरमीत सिंगने 10 धावा आणि व्हॅन शाल्क्विकने 11 धावा केल्या.

अर्शदीप सिंग भारतासाठी पहिल्या डावात स्टार होता. त्याने 4 षटकात 9 धावा देत 4 बळी घेतले. तर हार्दिक पांड्याने 2 आणि अक्षर पटेलला 1 विकेट मिळाली.