Swara Bhasker : नवी दिल्ली आणि मुंबईत सध्या विद्यार्थ्यांच्या आंदोलनाने राजकीय वातावरण चांगलेच तापले आहे. वैद्यकीय प्रवेश परीक्षेतील कथित पेपरफुटी आणि परीक्षेच्या व्यवस्थेतील अनियमिततेविरोधात सुरू झालेल्या आंदोलनाने आता राजधानी दिल्लीच्या पलीकडेही जोर पकडला आहे.

केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करत विद्यार्थी, तरुण आणि सामाजिक कार्यकर्ते रस्त्यावर उतरले आहेत. ‘कॉक्रोच जनता पार्टी’च्या नेतृत्वाखाली सुरू असलेल्या या आंदोलनाला देशभरातून पाठिंबा मिळत असल्याचा दावा आयोजकांकडून करण्यात येत आहे. सोमवारी मुंबईतही या आंदोलनाचे पडसाद उमटले आणि मोठ्या संख्येने आंदोलक रस्त्यावर उतरले.

याच आंदोलनादरम्यान अभिनेत्री स्वरा भास्करचा पती आणि राजकीय कार्यकर्ता फहाद अहमद याला पोलिसांनी ताब्यात घेतल्याचा दावा स्वराने सोशल मीडियावर केला आहे. फहादला पोलिसांनी ताब्यात घेतानाचा व्हिडीओ शेअर करत स्वराने मुंबई पोलिसांवर तीव्र शब्दांत संताप व्यक्त केला.

 

View this post on Instagram

 

A post shared by Swara Bhasker (@reallyswara)

स्वरा भास्करने इन्स्टाग्रामवर शेअर केलेल्या व्हिडीओमध्ये फहाद अहमदला काही पोलीस अधिकारी ताब्यात घेताना दिसत आहेत. व्हिडीओमध्ये एका अधिकाऱ्याने फहादची कॉलर पकडल्याचं दिसत असून, फहाद “तुम्ही मला का अटक करत आहात?” असा सवाल करताना ऐकू येतो. हा व्हिडीओ २० जुलै २०२६ रोजी दुपारी साडेचारच्या सुमारास चैत्यभूमी परिसरातील आंदोलनादरम्यान रेकॉर्ड झाल्याचं स्वराने म्हटलं आहे.

हा व्हिडीओ शेअर करत स्वराने लिहिलं, “मुंबई पोलिसांनी २० जुलै २०२६ रोजी दुपारी ४.३० वाजता चैत्यभूमी येथे फहाद आणि इतर आंदोलकांना ताब्यात घेतलं. त्याला माहीम पोलीस ठाण्यात ठेवण्यात आलं आहे. ही भारताची लोकशाही आहे. लज्जास्पद!”

Swara Bhasker

स्वराने आणखी एक व्हिडीओही शेअर केला आहे. या व्हिडीओमध्ये फहाद पोलिसांच्या वाहनात बसलेला दिसत असून, तो घटनास्थळावरील परिस्थिती सांगताना दिसतो. फहादनेच हा व्हिडीओ शेअर करण्यास सांगितल्याचं स्वराने म्हटलं आहे. तसेच इतर आंदोलकांनीही शांततेने घटनास्थळी जमावं, असं आवाहन तिने केलं.

दिल्लीतील आंदोलनाला मुंबईतूनही आवाज :

दरम्यान, दिल्लीतील जंतरमंतरवर सुरू असलेल्या आंदोलनाचा सोमवारी मोठा विस्तार झाला. ‘चला संसद’ मोर्चाच्या माध्यमातून आंदोलकांनी संसदेकडे कूच करण्याचा प्रयत्न केला. केंद्रीय शिक्षणमंत्री धर्मेंद्र प्रधान यांच्या राजीनाम्यासह आंदोलनकर्त्यांनी परीक्षाव्यवस्थेत संरचनात्मक सुधारणा आणि कथित गैरप्रकारांवर कठोर कारवाईची मागणी केली आहे. आंदोलनादरम्यान पोलिसांकडून आंदोलकांना रोखण्यासाठी कारवाई करण्यात आल्याचे वृत्त आहे.

या आंदोलनाला मनोरंजन क्षेत्रातील काही कलाकारांनीही पाठिंबा दिला आहे. अभिनेत्री शबाना आझमी आणि अभिनेता प्रकाश राज यांच्यासह काही सेलिब्रिटी आंदोलनस्थळी दिसले. शबाना आझमी यांनी आंदोलनाशी संबंधित व्हिडीओ सोशल मीडियावर शेअर केले.