Sushmita Sen :  बॉलिवूड अभिनेत्री आणि माजी मिस युनिव्हर्स सुष्मिता सेन तिच्या आत्मविश्वासपूर्ण आणि मोकळ्या स्वभावासाठी ओळखली जाते. आपल्या आयुष्यातील प्रसंग ती नेहमीच खुलेपणाने जगासमोर मांडते. अलीकडेच सुष्मिताने तिच्या पहिल्या बॉयफ्रेंडबद्दल एक भावनिक आठवण सांगितली, ज्यांनी तिच्या स्वप्नांसाठी स्वतःची स्वप्नं त्यागली होती.

ही गोष्ट आहे रजत तारा यांची. सुष्मिता सेनचे पहिले प्रेम. सुष्मिताने 1994 मध्ये मिस युनिव्हर्स किताब जिंकला आणि पहिली भारतीय महिला म्हणून इतिहास घडवला. त्या काळात रजत तारा यांनी तिच्या आयुष्यात महत्त्वाची भूमिका बजावली होती. म्हणतात, सुष्मिताला यशस्वी होण्यासाठी त्यांनी स्वतःची नोकरी सोडली होती.

सुष्मिताने ‘जीना इसी का नाम है’ या फारूख शेख यांच्या लोकप्रिय टॉक शोमध्ये या गोष्टीचा खुलासा केला होता. तिने सांगितले, “मी मिस इंडिया जिंकल्यानंतर मुंबईत ट्रेनिंगसाठी जाण्याचा निर्णय घेतला होता, पण तो माझ्यासाठी अवघड होता. रजतने माझ्या कुटुंबाला विश्वास दिला की तो माझ्यासोबत जाईल, जेणेकरून मला एकटं वाटू नये.”

त्यावेळी रजत कपड्यांच्या प्रसिद्ध ब्रँड बेनेटन मध्ये काम करत होते. सुष्मिता म्हणाली, “त्यांनी आपल्या बॉसला सांगितलं की मला एका महिन्याची सुट्टी हवी आहे, नाही दिलीत तर काही हरकत नाही. आणि त्यांना नोकरीवरून काढून टाकलं गेलं. पण त्यांच्या आधाराशिवाय मी मुंबईत एक महिना सुद्धा टिकू शकले नसते.”

सुष्मिताने भावनिकपणे म्हटलं, “त्यांनी स्वतःच्या स्वप्नांची बळी दिली, जेणेकरून मी माझी स्वप्नं पूर्ण करू शकले. त्यांचं माझ्यावर असलेलं प्रेम आणि विश्वास मी कधी विसरू शकत नाही. आज मी जी आहे, त्यात त्यांचाही मोठा वाटा आहे.”

मात्र, मिस युनिव्हर्स किताब जिंकल्यानंतर सुष्मिता आणि रजत यांनी परस्पर संमतीने वेगळं होण्याचा निर्णय घेतला. सुष्मिताने सांगितलं, “कोणी कोणाला सहज सोडत नाही, पण आयुष्य पुढे जातं आणि कधी कधी माणसंही.”

नंतर रजत तारा यांनी एका सर्बियन मुलीशी लग्न केलं आणि त्यांनी स्वतःच्या लग्नात सुष्मितालाही आमंत्रित केलं. विशेष म्हणजे, त्या लग्नात सुष्मिता ‘बेस्ट मॅन’ म्हणून उपस्थित होती.