नाशिक : दिंडोरी (नाशिक) येथे महात्मा फुले यांच्या पुतळ्याच्या अनावरण समारंभात राष्ट्रवादी काँग्रेस (शरद पवार गट)च्या खासदार सुप्रिया सुळे यांनी महायुती सरकारवर जोरदार टीका केली. यावेळी त्यांनी लाडकी बहीण योजनेतील कथित 4,800 कोटींच्या घोटाळ्याचा आरोप केला, तसेच मुख्यमंत्री एकनाथ शिंदे आणि मंत्री नरहरी झिरवाळ यांच्यावर थेट हल्ला चढवला. सुळेंनी आपल्या भाषणात अनेक मुद्द्यांवरून सरकारला धारेवर धरले आणि पक्षाच्या कार्यकर्त्यांना न घाबरण्याचे आवाहन केले. मटण खाण्यावरून टीकाकारांना प्रत्युत्तर सुप्रिया सुळे यांनी आपल्या खास शैलीत विरोधकांना प्रत्युत्तर दिले. “माझ्या पांडुरंगाला मी मटण खाल्लं तर चालतं, तुम्हाला काय प्रॉब्लेम? आम्ही आमच्या पैशाने मटण खातो, कुणाचे मिंधे नाही,” असे त्या म्हणाल्या. यावेळी त्यांनी मंत्री माणिकराव कोकाटे यांच्यावरही टीका केली. “पत्ते तुम्ही खेळायचे आणि कोर्टात चकरा आम्ही मारायच्या का? तुमची आब्रू तुमच्याच माणसाने घालवली. व्हिडीओ कोणी काढला?” असा थेट सवाल सुळेंनी कोकाटेंना विचारला. तसेच, “आमच्या रोहित पवारांना सतत नोटिसा येतात, पण आमचा रोहित घाबरत नाही,” असे म्हणत त्यांनी पक्ष कार्यकर्त्यांचा आत्मविश्वास वाढवला. मुख्यमंत्र्यांवर टीका: “वेळ मागितली, पण मिळाली नाही” सुप्रिया सुळे यांनी मुख्यमंत्री देवेंद्र फडणवीस यांच्यावरही निशाणा साधला. “दहा वेळा वेळ मागितली, पण मुख्यमंत्री वेळ देत नाहीत. म्हणून आम्ही थेट दिल्लीत गृहमंत्री अमित शाह यांची भेट घेतली,” असे त्या म्हणाल्या. यावेळी त्यांनी अमित शाह यांचे जाहीर आभार मानले आणि म्हणाल्या, “जुळवून दोन्ही बाजूंनी घ्यावं लागतं, एका बाजूने नाही.” हा टोला त्यांनी उपस्थित मंत्री नरहरी झिरवाळ यांना लगावला. सुळे यांनी पुढे सांगितले की, “मुख्यमंत्र्यांनी वेळ दिली नाही, म्हणून मी इथे मागण्या बंद केल्या. आता माझी कामं दिल्लीत होतात.” लाडकी बहीण योजनेतील कथित घोटाळ्याचा पर्दाफाश सुप्रिया सुळे यांनी लाडकी बहीण योजनेतील कथित अनियमिततेवर बोट ठेवले. “या योजनेत 4,800 कोटींचा मोठा घोटाळा झाला आहे. 25 लाख महिलांची नावं यादीतून काढली गेली. हजारो पुरुषांनी फॉर्म कसे भरले?” असा सवाल त्यांनी उपस्थित केला. त्या पुढे म्हणाल्या, “योजना लागू केली तेव्हाच आम्ही सांगितलं होतं की यामुळे राज्य आर्थिक संकटात जाईल. आता या योजनेची संपूर्ण चौकशी करणार आहोत.” यावेळी त्यांनी नरहरी झिरवाळ यांना आवाहन केले की, त्यांनी या घोटाळ्याचा ताकदीने विरोध करावा. निवडणूक घोटाळ्यांवर प्रश्नचिन्ह सुळे यांनी निवडणूक प्रक्रियेवरील अनियमिततांवरही प्रश्न उपस्थित केले. “188 लोक एका घरात राहू शकतात का? बारामतीत दीड लाख मतदार वाढले, शिरूरमध्ये एका घरात एवढी माणसं कशी निघतात? एकीकडे वोट चोरीचे आरोप, दुसरीकडे ॲम्ब्युलन्स घोटाळा,” असे त्या म्हणाल्या. तसेच, “झिरवाळ साहेब, तुम्ही पंतप्रधान झालात तरी आम्हाला आनंद आहे, पण कॉपी करून निवडणूक जिंकण्यात काय अर्थ?” असा टोला त्यांनी लगावला. “आता आम्ही निवडणूक आयोगाकडे तक्रार करून तपासणार आहोत,” असेही त्या म्हणाल्या. शरद पवारांचे पुरोगामित्व आणि देशहित सुळे यांनी शरद पवार यांच्या पुरोगामी विचारांचे कौतुक केले. “50 वर्षांपूर्वी शरद पवारांनी स्वतःचं ऑपरेशन केलं, पण पत्नीचं नाही. हे खरं पुरोगामित्व आहे,” असे त्या म्हणाल्या. तसेच, “ऑपरेशन सिंदूर दरम्यान आम्ही परदेशात जाऊन भारताची बाजू मांडली. पवार साहेबांनी सांगितलं, देश पहिला, मग राज्य, मग पक्ष, मग कुटुंब,” असे सांगत त्यांनी राष्ट्रहिताला प्राधान्य दिल्याचे अधोरेखित केले. रस्त्यांवरील खड्ड्यांवरून टीका सुळे यांनी राज्यातील खराब रस्त्यांवरूनही सरकारवर निशाणा साधला. “मोठा समृद्धी महामार्ग झाला, पण माझ्या गावाचा रस्ता झाला नाही. रस्त्यांमधील खड्ड्यांमुळे नाशिकला कंबर धरत धरत पोहोचले,” असे त्या म्हणाल्या. तसेच, “महाराष्ट्र दिवाळखोरीच्या उंबरठ्यावर आहे. आम्ही बोललो तर नोटिसा येतात, पण आम्ही घाबरणार नाही,” असे सांगत त्यांनी कार्यकर्त्यांना प्रोत्साहन दिले. नरहरी झिरवाळ यांना आवाहन सुळे यांनी नरहरी झिरवाळ यांना कॅबिनेटमध्ये जनतेचे प्रश्न मांडण्याचे आवाहन केले. “झिरवाळ साहेब, तुम्ही कॅबिनेटमध्ये गेल्यावर आमचं दुःख सांगा. रस्ते, पाणी, शेती यांचे प्रश्न सोडवा,” असे त्या म्हणाल्या. तसेच, “माझ्या राज्याचं नाव देशात पहिल्या क्रमांकावर असावं, ही माझी इच्छा आहे,” असेही त्या म्हणाल्या.
