Sunny Deol | Ramayana Movie : बॉलिवूड अभिनेता सनी देओल आणि रणदीप हुडा ‘जाट’ चित्रपटातून खळबळ माजवण्यास सज्ज झाले आहेत. या चित्रपटात दोन्ही स्टार पहिल्यांदाच स्क्रीन शेअर करताना दिसणार आहेत. चित्रपटाच्या प्रदर्शनासाठी फक्त २ दिवस शिल्लक आहेत.

मात्र, त्यापूर्वीच सनी देओलने चाहत्यांना आणखी एक मोठं गिफ्ट दिल आहे. एका कार्यक्रमात सनी देओलने सांगितलं की, तो नितेश तिवारीच्या आगामी ‘रामायण’ चित्रपटात हनुमानाची भूमिका साकारत आहे. ‘रामायण’ चित्रपटात रणबीर कपूर भगवान रामाची भूमिका साकारत आहे.

खरंतर, एका मुलाखतीत सनी देओल म्हणाला होता की, “मी ‘रामायण’मध्ये हनुमानाची भूमिका करत आहे. हो, हे खरं आहे”. जेव्हा अभिनेत्याला विचारण्यात आले की तो धार्मिक आहे का, तेव्हा देओलने उत्तर दिले, “देवावर कोण विश्वास ठेवत नाही? आपण देवामुळेच अस्तित्वात आहोत.”

यावेळी सनी देओलला विचारण्यात आले की जेव्हा त्याला पहिल्यांदा पटकथा ऑफर करण्यात आली तेव्हा त्याला हनुमानाची भूमिका आव्हानात्मक वाटली का? या प्रश्नाचे उत्तर देताना, अभिनेता म्हणाला, “स्टार्ससाठी, आम्हाला आव्हानात्मक गोष्टी आवडतात कारण त्या मजेदार असतात.

आम्हाला पात्र चांगले साकारावे लागते आणि आमच्या दिग्दर्शकाचे ऐकावे लागते. मी माझ्या भूमिकेत पूर्णपणे बुडून जातो जेणेकरून लोक त्यावर विश्वास ठेवतील. मी अजून शूटिंग सुरू केलेले नाही, पण हा सर्वात मोठ्या चित्रपटांपैकी एक असेल”. असं सनी यावेळी म्हणाला.

दरम्यान, ‘रामायण’मध्ये अभिनेता रणबीर कपूर भगवान रामाची भूमिका साकारत आहे, तर साई पल्लवी सीतेची भूमिका साकारताना दिसणार आहे, तर यशने तो शक्तिशाली रावणाची भूमिका साकारणार असल्याचे पुष्टी केली आहे.

या चित्रपटात कैकेयीच्या भूमिकेत लारा दत्ता, हनुमानाच्या भूमिकेत सनी देओल आणि मंथ्राच्या भूमिकेत शीबा चड्डा देखील आहेत. नितेश तिवारी दिग्दर्शित, रामायणचा पहिला भाग २०२६ च्या दिवाळीत भव्य प्रदर्शनासाठी सज्ज आहे, तर त्याचा सिक्वेल २०२७ च्या दिवाळीत प्रदर्शित होणार आहे.

आगामी ‘जाट’ चित्रपटाविषयी बोलायचे झाले तर या चित्रपटाचे दिग्दर्शन गोपीचंद मालिनेनी यांनी केले आहे. यात विनीत कुमार सिंग, सैयामी खेर आणि रेजिना कॅसांड्रा यांच्याही भूमिका आहेत.

या चित्रपटाचे अ‍ॅक्शन कोरिओग्राफी अनल अरसू, राम लक्ष्मण आणि वेंकट यांनी केली आहे, जे रोमांचक लढायांची दृश्य मेजवानी देतात. मिथ्री मूव्ही मेकर्स आणि पीपल मीडिया फॅक्टरी निर्मित हा चित्रपट १० एप्रिल रोजी हिंदी, तमिळ आणि तेलगूमध्ये प्रदर्शित होईल.