Railway job : सरकारी नोकरी मिळवण्यासाठी स्पर्धा परीक्षांची तयारी करणाऱ्या तरुणांसाठी रेल्वेकडून एक मोठी संधी उपलब्ध झाली आहे. दहावी उत्तीर्ण आणि ITI केलेल्या उमेदवारांना आता उत्तर रेल्वेमध्ये अप्रेंटिस म्हणून प्रशिक्षण घेण्याची संधी मिळणार आहे. रेल्वे रिक्रूटमेंट सेलने (RRC) तब्बल ४,६५१ अप्रेंटिस पदांसाठी भरती प्रक्रिया जाहीर केली आहे.

विशेष म्हणजे, या भरतीसाठी कोणतीही लेखी परीक्षा किंवा मुलाखत घेतली जाणार नाही. उमेदवारांची निवड दहावी आणि ITI मधील गुणांच्या आधारे तयार होणाऱ्या गुणवत्ता यादीतून केली जाणार आहे. ११ नोव्हेंबरपासून अर्ज प्रक्रिया सुरू झाली असून इच्छुक उमेदवारांना ११ डिसेंबर २०२६ पर्यंत ऑनलाइन अर्ज करता येणार आहे.

कोणत्या विभागात किती पदे?

उत्तर रेल्वेने २०२६-२७ या वर्षासाठी अप्रेंटिस कायदा १९६१ अंतर्गत विविध विभाग, कार्यशाळा आणि युनिटमध्ये प्रशिक्षणार्थींच्या जागा जाहीर केल्या आहेत. एकूण ४,६५१ जागांचे क्लस्टरनिहाय वर्गीकरण पुढीलप्रमाणे आहे.

लखनऊ क्लस्टर (LKO) – १,५२५ जागा

दिल्ली क्लस्टर (DLI) – १,३१२ जागा

फिरोजपूर क्लस्टर (FZR) – ७४० जागा

अंबाला क्लस्टर (UMB) – ९७९ जागा

मुरादाबाद क्लस्टर (MB) – ६३ जागा

जम्मू क्लस्टर – ३२ जागा

वयोमर्यादा किती? कोण अर्ज करू शकणार?

या भरतीसाठी उमेदवारांचे वय १५ ते २४ वर्षांच्या दरम्यान असणे आवश्यक आहे. वयोमर्यादेची गणना ११ डिसेंबर २०२६ या तारखेनुसार केली जाणार आहे. आरक्षित प्रवर्गातील उमेदवारांना नियमानुसार वयोमर्यादेत सवलत दिली जाणार आहे.

शैक्षणिक पात्रता काय असणार?

या पदांसाठी अर्ज करणाऱ्या उमेदवारांनी मान्यताप्राप्त शिक्षण मंडळातून दहावीची परीक्षा किमान ५० टक्के गुणांसह उत्तीर्ण केलेली असावी. याशिवाय संबंधित ट्रेडमधील ITI प्रमाणपत्र असणे आवश्यक आहे. हे प्रमाणपत्र NCVT किंवा SCVT मान्यताप्राप्त संस्थेकडून मिळालेले असावे.

लेखी परीक्षा नाही, दहावी आणि ITI गुणांवर निवड!

या भरतीचे सर्वात महत्त्वाचे वैशिष्ट्य म्हणजे उमेदवारांना लेखी परीक्षा किंवा मुलाखतीला सामोरे जावे लागणार नाही. दहावी आणि ITI मधील गुणांना समान महत्त्व देऊन त्यांची सरासरी काढली जाईल. त्यानुसार गुणवत्ता यादी तयार केली जाणार आहे. त्यानंतर कागदपत्र पडताळणी आणि वैद्यकीय तपासणीची प्रक्रिया पूर्ण केली जाईल.

अर्ज कसा आणि कुठे करायचा?

अर्ज सुरू होण्याची तारीख – ११ नोव्हेंबर २०२६

अर्ज करण्याची अंतिम तारीख – ११ डिसेंबर २०२६

अर्ज करण्याची पद्धत – ऑनलाइन

अधिकृत संकेतस्थळ – www.rrcnr.org

जाहिरात क्रमांक – RRC/NR/03/2026/Act Apprentice

इच्छुक उमेदवारांनी उत्तर रेल्वेच्या अधिकृत संकेतस्थळाला भेट देऊन भरतीची सविस्तर अधिसूचना वाचावी आणि त्यानंतर ऑनलाइन अर्ज भरावा.