Sunetra Pawar – जिल्हा परिषद प्राथमिक शाळा, कान्हे येथे शालेय शिक्षण विभाग आणि मावळ पंचायत समिती शिक्षण विभागाच्या संयुक्त विद्यमाने शाळा प्रवेशोत्सव उत्साहपूर्ण वातावरणात पार पडला. यावेळी महाराष्ट्राच्या उपमुख्यमंत्री सुनेत्रा पवार यांनी नव्याने प्रवेश घेतलेल्या विद्यार्थ्यांचे स्वागत करून शुभेच्छा दिल्या. कार्यक्रमाला आमदार सुनील शेळके, जिल्हा परिषद अधिकारी गजानन पाटील, बांधकाम सभापती दीपाली, सभापती सुनीता येवले,

उपसभापती साहेबराव कारके आदींसह शिक्षण विभागाचे अधिकारी, शिक्षक, पालक आणि ग्रामस्थ मोठ्या संख्येने उपस्थित होते. यावेळी बोलताना जिल्हा परिषद अधिकारी गजानन पाटील यांनी पुणे जिल्हा परिषद शाळांमध्ये राबविण्यात येत असलेल्या विविध शैक्षणिक उपक्रमांचा आढावा घेतला. जिल्ह्यात सुमारे ५०० मॉडेल स्कूल उभारण्याचे काम सुरू असून त्यापैकी ५० शाळा मावळ तालुक्यात विकसित होत असल्याची माहिती त्यांनी दिली. आमदार सुनील शेळके यांनी माझी शाळा सुंदर शाळा या उपक्रमामुळे जिल्हा परिषद शाळांचे रूप पालटत असल्याचे सांगितले.

उपमुख्यमंत्री सुनेत्रा पवार यांनी शिक्षण हा विद्यार्थ्यांच्या आयुष्याचा भक्कम पाया असल्याचे सांगत ग्रामीण भागातील विद्यार्थ्यांनाही शहरी विद्यार्थ्यांप्रमाणे दर्जेदार शिक्षण मिळावे यासाठी शासन कटिबद्ध असल्याचे नमूद केले. विद्यार्थ्यांमध्ये असलेल्या सुप्त गुणांना वाव देण्यासाठी नासा, इस्रो यांसारख्या संस्थांशी संबंधित शैक्षणिक संधी उपलब्ध करून देण्याचा प्रयत्न सुरू असल्याचेही त्यांनी स्पष्ट केले.

नासा प्रशिक्षणाचा अनुभव
विद्यार्थीनी रूद्रा राजगुरे हिने नासा प्रशिक्षण शिबिरात सहभागी झाल्यानंतरचा प्रेरणादायी अनुभव आपल्या लेखातून मांडला आहे. या लेखामध्ये तिने अंतराळ विज्ञान, संशोधनाची प्रक्रिया, विविध देशांतील विद्यार्थ्यांशी झालेला संवाद तसेच ॲस्ट्रोनॉट ट्रेनिंग एक्स्पिरियन्समधून मिळालेल्या ज्ञानाचा सविस्तर उल्लेख केला आहे.