राजगुरुनगर : दि. 21 (प्रतिनिधी) -खेड तालुक्यातील आरटीई प्रवेश प्रक्रियेमध्ये गैरव्यवहार झाल्याचा आरोप करत खेड पंचायत समितीमधील राष्ट्रवादी काँग्रेस व शिवसेना सदस्यांनी पंचायत समितीच्या प्रवेशद्वाराबाहेर निषेध आंदोलन केले. यावेळी शिक्षण विभागाविरोधात जोरदार घोषणाबाजी करण्यात आली. आरटीई प्रवेश प्रक्रियेत शिक्षण विभागातील अधिकार्यांनी मोठा भ्रष्टाचार केल्याचा आरोप करत या प्रकरणाची विभागीय आयुक्तांकडून सखोल चौकशी करण्यात यावी, अशी मागणी आंदोलक सदस्यांनी केली आहे. पंचायत समितीच्या गुरुवारी (दि. 21) होणार्या मासिक सभेपूर्वी राष्ट्रवादी काँग्रेसचे सहा व शिवसेनेचा एक असे एकूण सात सदस्यांनी प्रवेशद्वाराबाहेर आरटीई प्रवेश भ्रष्टाचाराचे फलक गळ्यात घालून आंदोलन केले. या आंदोलनात पंचायत समिती सदस्य महेंद्र मेदनकर, शंकर कावडे, दिनेश हांडे, श्रद्धा मांडेकर, अश्विनी तरस, मनीषा हिले व निखिल थोरवे सहभागी झाले होते. शासनाच्या शैक्षणिक धोरणानुसार राज्यातील खासगी इंग्रजी माध्यमाच्या शाळांमध्ये आरटीई अंतर्गत प्रवेश प्रक्रिया राबविण्यात आली आहे. प्रवेश निश्चित झालेल्या विद्यार्थ्यांना इयत्ता पहिली ते दहावीपर्यंत मोफत शिक्षण दिले जाणार आहे. खेड तालुक्यातील विविध शाळांमध्ये लॉटरी पद्धतीने 864 प्रवेश निश्चित करण्यात आले. पंचायत समितीचे गटशिक्षणाधिकारी अमोल जंगले यांच्या मार्गदर्शनाखाली ही प्रक्रिया पार पडली. मात्र, नियमात न बसणारे असल्याचे कारण देत अनेक विद्यार्थ्यांचे प्रवेश फेटाळण्यात आले, तर लॉटरीत दूर क्रमांक असलेल्या काही विद्यार्थ्यांना संधी देण्यात आल्याचा आरोप आंदोलकांनी केला आहे. दरम्यान, शिवसेना उद्धव बाळासाहेब ठाकरे गटाचे जिल्हा परिषद गटनेते ड. विजयसिंह शिंदे पाटील यांनीही जिल्हाभरातील आरटीई प्रवेश प्रक्रिया आर्थिक तडजोडीतून झाल्याचा आरोप केला आहे. त्यामुळे खेड तालुक्यातील आरटीई प्रवेश प्रक्रियेचा मुद्दा सध्या चर्चेच्या केंद्रस्थानी आला आहे. जिल्हा परिषदेमधील विरोधी गटातील सदस्यांनीही हा मुद्दा जिल्हा परिषदेत उपस्थित केला आहे. मी राहत असलेल्या परिसरात एका विद्यार्थ्याच्या पालकांच्या घरी शिक्षण विभागाचे अधिकारी पाहणीसाठी वारंवार जात होते. संबंधित पालकांवर दबाव टाकण्यात आला. तीन वेळा भेट देऊन आर्थिक व्यवहार करून त्या विद्यार्थ्याला प्रवेश देण्यात आला. तालुक्यात अनेक पालकांवर दबाव टाकून त्यांच्या मुलांना आरटीई प्रवेश देण्यात आले आहेत. मुळात पालकांच्या घरी तीन वेळा जाण्याचा अधिकार शिक्षण विभागाला कोणी दिला? खेड तालुक्यात आरटीई प्रवेश प्रक्रियेत मोठा भ्रष्टाचार झाला आहे. -शंकर कावडे, सदस्य तथा गटनेते, खेड पंचायत समिती हेही वाचा : Pune District : जुन्या वादातून तरुणावर जीवघेणा हल्ला; हायवाने चार वाहनांची तोडफोड: पाच आरोपी अटकेत
