अस्मिता हिरवे
Sugar Price Hike – साखर आणि गुळाने आतापर्यंतचा उच्‍चांक गाठला आहे. एन सणासुदीपूर्वी साखर आणि गुळाच्‍या दरात मोठ्या प्रमाणात वाढ झाली असून भविष्यात दर आणखी वाढण्याच्‍या चर्चांनी बाजारात संभ्रमाचे वातावरण निर्माण झाले आहे. या चर्चांनी जमाखोरीत वाढ होत आहे आणि लहान व्‍यापाऱ्यांमध्ये भितीचे वातावरण आहे. साखर किती खरेदी करावी? असा प्रश्न त्‍यांना पडला आहे.

जर आता चढ्या दराने साखर खरेदी करुन ठेवली आणि सरकारने दरांवर नियंत्रण आणल्‍यास मोठे नुकसान होण्याची भीती आहे आणि खरेदी केली नाही व भविष्यात दर वाढले तर काय करायचे, अशी परिस्थिती आहे. साखर आणि गुळाच्या दरात गेल्या महिन्यापासून सातत्याने वाढ होत असून, त्याची झळ आता सर्वसामान्यांच्या स्वयंपाकघरापासून मिठाई, चहा आणि बेकरी व्यवसायापर्यंत जाणवू लागली आहे.

साखरेचा दर किलोमागे ५८ ते ६० रुपयांवर पोहोचला असून, यापूर्वी तो सुमारे ४६ रुपये होता. गुळाचाही दर ५० ते ५५ रुपयांपर्यंत वाढला आहे. यापूर्वी गुळाचा दर सुमारे ४५ रुपये होता. उत्पादन घटणे, उसाची कमतरता आणि इथेनॉल निर्मितीकडे उसाचा काही हिस्सा वळविणे, ही दरवाढीमागील प्रमुख कारणे मानली जात आहेत.

गुळाच्या बाजारातही तुटवड्याचे चित्र आहे. उत्पादन घटण्याबरोबरच स्थानिक, परराज्य तसेच परदेशातील मागणी वाढल्याने गुळाच्या दराला आधार मिळाला आहे. श्रावण, नागपंचमी, रक्षाबंधन आणि गणेशोत्सवामुळे मिठाई व गोड पदार्थांची मागणी वाढली आहे. ऑगस्ट महिन्यासाठी जाहीर करण्यात आलेला साखरेचा सरकारी कोटाही मागणीच्या तुलनेत कमी पडत असल्याचे व्यापाऱ्यांचे म्हणणे आहे.

“उसाचा मोठा हिस्सा इथेनॉल निर्मितीकडे वळल्याने साखरेचे उत्पादन आणि बाजारातील उपलब्धता कमी झाली आहे. त्यातच मागणी वाढल्याने साखर व गुळाच्या दरात वाढ झाली. ही दरवाढ सध्या तात्पुरती असून, पुढील हंगामात उत्पादन आणि पुरवठा सुधारल्यानंतर दर स्थिर होण्याची शक्यता आहे.”
– अनिल लोखंडे, व्हॉइस चेअरमन, संत तुकाराम सहकार कारखाना