जांबूत: शिरूर तालुक्यातील दळणवळणाच्या दृष्टीने महत्वपूर्ण मार्ग असलेला इतर जिल्हा मार्ग पिंपरखेड ते वडनेर खुर्द रस्त्याचे सुमारे ११ कि.मी.चे कॉंक्रेटीकरणाच्या कामासाठी माजी मंत्री दिलीप वळसे पाटील यांचे माध्यमातून सुमारे १४ कोटी ९५ लक्ष रुपयांच्या निधीला मंजुरी मिळाल्यानंतर या रस्त्याचे कामाला सुरुवात करण्यात आली; मात्र यामध्ये एक वर्षाचा कालावधी उलटून गेल्याने अद्यापही संबंधित रस्त्याचे काम पूर्णत्वास न गेल्याने पिंपरखेड, चांडोह आणि परिसरातील नागरिकांनी नाराजी व्यक्त केली आहे.

पिंपरखेड – वडनेर खुर्द रस्त्याचे काम अद्याप पूर्णत्वास गेलेले नसून कामासाठी रस्त्याचे खोदकाम करण्यात आले व त्यावर खडीचा थरही देण्यात आला. मात्र या रस्त्यावरून असलेली वर्दळ पाहता परिसरातील गावांतील अनेक नागरिक आणि शालेय विद्यार्थी मोठ्या प्रमाणात या मार्गावरून ये- जा करत असून रस्त्यावर पसरवलेल्या खडीवरून दुचाकींचे अनेक छोट मोठे अपघाताच्या घटना घडल्या आहेत.

तसेच सायकलकरून प्रवास करताना अनेक शालेय विद्यार्थ्यांना अपघातांचा सामना करावा लागला असून, मुख्यमंत्री ग्रामसडक योजना विभाग तथा सार्वजनिक बांधकाम विभाग मात्र संबंधित रस्त्याचे कामाकडे दुर्लक्ष करत आहे काय असाही प्रश्न उपस्थित करण्यात आला आहे. सदर रस्त्याचे कामाचा दर्जाही निकृष्ट असल्याचा आरोप परिसरातील युवकांनी केला आहे.

मात्र खोदकाम करून ठेवलेल्या रस्त्यावर एखादा अपघात होऊन काही घटना घडल्यास याला संबंधित ठेकेदार, मुख्यमंत्री ग्रामसडक योजना विभाग आणि  सार्वजनिक बांधकाम विभाग हे जबाबदार राहणार असून अपूर्ण रस्त्याचे काम इस्टीमेटप्रमाणे मार्गी लावण्याची मागणी परिसरातील ग्रामस्थांनी केली आहे.

 

पिंपरखेड – वडनेर खुर्द रस्त्याचे काम चालू आहे मात्र सदर रस्त्यावर कामासाठी खडीचे जे थर देण्यात आले त्यावर पाणी मारून रोलिंग करण्यात आले नाही. सदरच्या खडीवरून मागील काही दिवसांत अनेक शालेय विद्यार्थ्यांच्या अपघातांच्या दुर्घटना घडल्या असून दोन विद्यार्थ्यांसह एक शालेय विद्यार्थी यामध्ये जखमी झाली होती. तरी संबंधित ठेकेदार यांनी सदर काम पाउस सुरु होण्याअगोदर मार्गी लावणे गरजेचे आहे.
– शुभम बोंबे, युवा नेते पिंपरखेड

सदर रस्त्याचे काम जरी चालू असले तरी ते धोकादायक स्वरूपाचे वाटत आहे. शुक्रवार (दि.१२) रोजी सकाळी या रस्त्यावरून प्रवास करत असताना शालेय विद्यार्थ्याचा अपघात झाला. सुदैवाने कोणतीही अनुचित घटना घडली नाही मात्र सदर रस्त्याच्या बाजूने टाकण्यात आलेली खडी आणि दगड यामुळे त्याच्या डोक्याला मोठी इजा होण्यापासून विद्यार्थी बचावला असल्याने तात्काळ हे काम मार्गी लावणे गरजेचे आहे.
– निलेश भुजबळ, सामाजिक कार्यकर्ते , चांडोह