चाकण : महाळुंगे ते चास या प्रमुख जिल्हा मार्ग क्रमांक 18 वरील कोरेगाव खुर्द गावातून जाणार्‍या रस्त्याची अत्यंत दुरवस्था झाल्याने वाहनचालक, पादचारी आणि स्थानिक नागरिकांना मोठ्या अडचणींचा सामना करावा लागत आहे. रस्त्यावरील खड्डे, उखडलेला डांबरी पृष्ठभाग आणि रखडलेल्या कामामुळे नागरिकांमध्ये तीव्र नाराजी व्यक्त होत आहे.

स्थानिकांच्या माहितीनुसार, या रस्त्याच्या कामासाठी सुमारे तीन वर्षांपूर्वी निविदा प्रक्रिया पूर्ण झाली होती; मात्र संबंधित ठेकेदाराकडून अद्यापही काम पूर्ण करण्यात आले नसल्याचा आरोप ग्रामस्थांनी केला आहे. रस्त्यावरील अनेक ठिकाणी मोठे खड्डे पडले असून पावसाळ्यात त्यामध्ये पाणी साचत असल्याने अपघातांचा धोका वाढला आहे. या मार्गावरून दररोज शाळकरी विद्यार्थी, शेतकरी, दुचाकीस्वार तसेच विविध गावांतील नागरिकांची मोठ्या प्रमाणावर वाहतूक होत असते. खराब रस्त्यामुळे वाहनांचे नुकसान होत असून प्रवासासाठी अधिक वेळ लागत असल्याच्या तक्रारी नागरिकांनी केल्या आहेत. विशेषतः दुचाकीस्वार आणि पादचार्‍यांसाठी हा मार्ग धोकादायक बनला आहे.

रस्त्याच्या दुरुस्तीबाबत संबंधित विभागाकडे अनेक वेळा पाठपुरावा करूनही कामाला अपेक्षित गती मिळालेली नाही. त्यामुळे ठेकेदार आणि संबंधित यंत्रणांच्या कार्यपद्धतीवर प्रश्नचिन्ह उपस्थित केले जात आहे. रखडलेल्या कामाची चौकशी करून जबाबदारांवर कारवाई करावी आणि रस्त्याचे काम तातडीने पूर्ण करावे, अशी मागणी नागरिकांनी केली आहे. प्रशासनाने त्वरित दखल न घेतल्यास लोकप्रतिनिधी आणि संबंधित विभागाविरोधात तीव्र आंदोलन छेडण्याचा इशाराही ग्रामस्थांनी दिला आहे.

नागरिकांच्या प्रमुख मागण्या

• रस्त्याचे रखडलेले काम तातडीने पूर्ण करावे.
• ठेकेदाराच्या विलंबाची चौकशी करून कारवाई करावी.
• अपघात टाळण्यासाठी खड्डे त्वरित बुजवावेत.
• संबंधित अधिकार्‍यांनी प्रत्यक्ष पाहणी करून आवश्यक उपाययोजना कराव्यात.

हेही वाचा : Pune District : हुमणी अळी नियंत्रणासाठी बांधावर मार्गदर्शन