बेलग्रेड, (सर्बिया) – सर्बियामध्ये संसदेच्या निवडणुका मुदतीपूर्वी घेण्यात याव्यात, या मागणीसाठी विद्यापीठातील विद्यार्थ्यांनी सह्यांचे अभियान सुरू केले आहे. मुदतपूर्व निवडणुकांद्वारे देशातील एकाधिकारशाही अध्यक्ष अलेक्सांदर वुसिक यांना हटवले जाईल, अशी आशा विद्यार्थ्यांकडून व्यक्त केली जाते आहे. देशभरातल्या डझनभर शहरांमध्ये ५०० ठिकाणी विद्यार्थी नागरिकांकडून मुदतपूर्व निवडणुकांची मागणी करणाऱ्या निवेदनावर सह्या घेतल्या जात आहेत. नोव्हेंबर २०२४ मध्ये एका रेल्वे स्थानकाचे छत कोसळून झालेल्या दुर्घटनेत १६ जण ठार झाले होते. अध्यक्ष वुसिक यांच्याविरोधात पहिल्यांदा असंतोष निर्माण झाला होता. सार्वजिनक बांधकामांमध्ये भ्रष्टाचाराचा आरोप करत विद्यार्थ्यांनी अध्यक्षांना या दुर्घटनेसाठी जबाबदार धरले होते. वुसिक यांनी तात्काळ मुदतपूर्व निवडणुका घेण्यास नकार दिला आहे, परंतु पुढील वर्षी निवडणूका होऊ शकतील, असे म्हटले आहे. वुसिक १३ वर्षांपेक्षा जास्त काळ सर्बियाचे अध्यक्ष राहिले आहेत. त्यांच्याविरोधात प्रथमच उघडपणे एवढे मोठे आंदोलन झाल्यानंतर वुसिक यांच्या सरकारमधील पंतप्रधानांनी गेल्या वर्षी राजीनामा दिल्यामुळे त्यांची राजवट हादरली आहे. सर्बियाला युरोपीय संघामध्ये सामील केले जाईल, असे आश्वासन वुसिक यांनी पूर्वी दिले होते. मात्रनंतर त्यांनी रशिया आणि चीनशी जवळीक वाढवली. त्याशिवाय देशांतर्गत लोकशाही स्वातंत्र्याची पायमल्ली केली आणि भ्रष्टाचारास अनुमती दिल्याचा आरोपही त्यांच्यावर केला जातो आहे.
