नाशिक – मुलगा हा वंशाचा दिवा असतो तर मुलगी ही वंशाची पणती असते. त्यामुळे मुलगी देखील आपल्या जबाबदाऱ्या एकदम चोखपणे पार पडत असते. याचे उत्तम उदाहरण नाशिक जिल्ह्यातील तीन मुलींनी घडवून दिले आहे. केवळ अर्धा एकर शेत जमिनीचा तुकडा अवर्षणग्रस्त परिस्थिती आणि पोटी चार मुली व एक मुलगा.

परंतु अशा परिस्थितीमध्ये हार न मानता नाशिक जिल्ह्याच्या सिन्नर तालुक्यातील घोटेवाडी येथील किसन घोटेकर या शेतकऱ्याने काबाडकष्ट करून मुलींचे शिक्षण केले. खडतर परिस्थितीशी झुंज देऊन तीन मुलींना पोलीस खात्यात भरती करत समाजापुढे एक आदर्श निर्माण केला आहे.

फक्त अर्धा एकर शेतीवर चालतो कुटुंबाचा उदरनिर्वाह…

किसन घोटेकर आणि पत्नी संगीत हे दोघे मिळून अर्धा एकर शेतीची मशागत करून आपल्या कुटुंबाचा उदरनिर्वाह चालवतात. तसेच त्यांची शेती अवर्षणग्रस्त क्षेत्रात असल्यामुळे कुटुंबाचा उदरनिर्वाह चालवण्यासाठी या घोटेकर दाम्पत्याला प्रचंड कष्ट घ्यावे लागले. आपल्या आईवडिलांच्या कष्टाची जाण धरत रोहिणी, आरती आणि स्वाती या तिन्ही मुली पोलीस खात्यात भरती झाले आहेत. तर प्रतीक्षा व समाधान या दोघांचे शिक्षण सुरु आहे.

वेळेप्रसंगी विकला भाजीपाला…

किसन आणि संगीता घोटेकर या दाम्पत्याने शेतीच्या जीवावर मुलांचे शिक्षण पूर्ण करता येत नव्हते त्यामुळे वेळेप्रसंगी गावो-गावी बाजारात जाऊन भाजीपाला विक्री करण्याचे काम केले.

‘आज आमच्या आई वडिलांच्या कष्टाचे चीज झाले’…

पोलीस खात्यामध्ये भरती झाल्यावर आरती आणि रोहिणीने आपले मत व्यक्त केले. त्या म्हणाल्या कि ” आमची मोठी बहीण चार वर्षांपूर्वी पोलिसांमध्ये भरती झाली होती. तिने आम्हा दोघी बहिणींना खूप मार्गदर्शन केले. आई-वडील, मामा व नातेवाईक आमच्या पाठीशी खंबीरपणे उभे होते. पोलीस खात्यात भरती होण्यासाठी आम्ही प्रचंड मेहनत घेतली.

तसेच आमच्या आईवडिलांच्या कष्टाचे चीज झाले याचा आम्हाला आनंद आहे’. दरम्यान, या प्रसंगामुळे किसन घोटेकर व त्यांच्या मुलींचे संपूर्ण पंचक्रोशीत कौतूक होत असून. लोकांकडून त्यांचा सत्कार समारंभ केला जात आहे.