पुणे : पुण्यातील येरवडा परिसरात गाडी थांबवून मद्यधुंद अवस्थेत अश्लील वर्तन करणाऱ्या गौरव आहुजाला अखेर साताऱ्यातून ताब्यात घेण्यात आले आहे. पुण्यातील बड्या उद्योगपतीचा मुलगा असणाऱ्या गौरवने सार्वजनिक ठिकाणी दाखवलेली पैशांची मस्ती एका नागरिकाने आपल्या मोबाईलमध्ये चित्रित केल्यानंतर याबाबतचा व्हिडिओ सोशल मीडियावर मोठ्या प्रमाणात व्हायरल झाला. त्यानंतर सर्वत्र संताप व्यक्त केला जाऊ लागला. या घटनेनंतर गौरव हा फरार झालेला होता.

त्यादरम्यान शनिवारी सायंकाळी त्याने व्हिडिओ व्हायरल करून माफी मागितली होती. तसेच काही तासांत येरवडा पोलीस ठाण्यात हजर होऊ, असे सांगितले होते. मात्र त्यापूर्वी शनिवारी रात्री गौरवला सातारा पोलिसांनी ताब्यात घेतले. त्यानंतर पोलिसांनी गौरव अहुजाला 7 दिवसांची पोलीस कोठडी द्या अशी मागणी केली होती, आज दोन्ही आरोपींना कोर्टासमोर हजर करण्यात आले, कोर्टात या दोन्ही तरूणांच्या वकीलांनी जोरदार युक्तीवाद केला आहे.

सरकारी वकीलांचा युक्तीवाद

या प्रकरणात आरोपीची व्हिडिओ क्लिप आहे. सार्वजनिक ठिकाणी आरोपी बेशिस्त वागला आहे. महिला वर्ग असताना त्याने रस्त्यावर लघुशंका केली. एकाच्या हातात दारूची बाटली होती, तरी तो गाडी चालवत होता. आरोपीने कुठल्या अमली पदार्थांच सेवन केले होते का? तो रात्री कुठ होता? पार्टी कुठं झाली त्यानंतर तो कुठ गेला याचा शोध घ्यायचा आहे. घटनेनंतर पोलिसांनी आरोपीचा शोध घेतला पण तो मिळाला नाही. पुरावा नष्ट करण्यासाठी तो फरार होता असं दिसून येत आहे. आरोपीची गाडी जप्त करायची आहे. त्यामुळे आरोपीला ७ दिवसांची पोलीस कोठडी देण्यात यावी, अशी मागणी सरकारी वकिलांनी केली आहे.

भाग्येश ओसवाल याच्या वकीलांचा युक्तीवाद

भाग्येश ओसवाल याचे वकील पुष्कर दुर्गे यांनी युक्तीवाद करताना म्हणाले की, एक व्यक्ती गाडीतून खाली उतरली, पण माझा अशिल गाडीत बसला होता. ओसवाल गाडीतून खाली उतरला नाही, ओसवाल गाडी सुद्धा चालवत नव्हता. भाग्येश ओसवाल स्वतः पोलिसात हजर झाला आहे. भाग्येश ओसवाल याचा या गुन्ह्याशी काय संबंध आहे? फक्त गाडीत शेजारी बसला म्हणून त्याच्यावर कलम लावला गेला. भाग्येश ओसवाल याचा जामीन अर्ज दाखल करणार आहे.

गौरव आहुजाच्या वकिलांचा युक्तीवाद

आरोपी गौरव आहुजाचे वकिल सुरेंद्र आपुणे यांनी म्हटलं की, नोटीस द्यायची नाही, मिडिया आणि राजकीय दबावाखाली या सगळ्या गोष्टी पोलिसांनी केल्या आहेत. सरळपणे सेक्शन 65 लावला गेला. जो पर्यंत केमिकल रिपोर्ट येत नाही, तोपर्यंत कलम 65 लागू शकत नाही. पोलिसांनी असे कुठले ही द्रव्य जप्त केले नाही. गाडी गुन्ह्यात वापरली नाही, मिडिया ट्रायल आल्यामुळे या सगळ्या गोष्टीमुळे घडल्या आहेत. जस्टीफिकेशन पोलिसांकडून दिसून येत नाही, आरोपी पळून गेलेला नाही, तो स्वतः कराड पोलिसांकडे हजर झालाय, असा युक्तीवाद गौरव आहुजा याच्या वकीलांनी केला.

यावर सरकारी वकिलांनी म्हटलं आहे की, व्हिडिओमध्ये स्पष्ट दिसत आहे की, आरोपीच्या हातात दारूची बाटली आहे. 1.5 दिवस तो गायब आहे, त्यामुळे केमिकल अॅनालायझर टेस्ट झाली नाही. दारूच्या नशेत त्यांनी वाहन चालवले आहे. पोलिसांकडून सर्व नोटीस देण्यात आल्या आहेत, अशी माहिती सरकारी वकिलांनी कोर्टामध्ये युक्तीवाद करताना दिली.

काय आहे प्रकरण?

येरवड्यातील शास्त्रीनगर चौकात मद्यधुंद अवस्थेतील तरुणाकडून धक्कादायक आणि किळसवाणा प्रकार घडला. या घटनेचा व्हिडिओ व्हायरल झाल्याने समाजमाध्यमातून मोठ्या प्रमाणात टीका झाली. फुटपाथवर लघुशंका करताना तेथून जाणाऱ्या एका व्यक्तीने हे सर्व आपल्या मोबाइलमध्ये शूट केले. त्यामध्ये हा तरुण लघुशंका करताना तसेच काय करणार व्हिडिओ शूट करुन? असे त्या व्यक्तीशी बोलताना दिसतो आहे.

तसेच कारमध्ये बसल्यानंतर त्याने आपली पँट खोलून किळसवाणे कृत्य केले, हे देखील मोबाइलच्या कॅमेरॅत शूट झाले आहे. यानंतर कारचा दरवाजा लावत त्याने अत्यंत वेगाने कार दामटली आणि तो येरवड्याच्या दिशेने निघून गेला. विशेष म्हणजे ज्यावेळी तो फुटपाथवर लघुशंका करीत होता तेव्हा बाजुने काही महिला देखील चालल्या होत्या.