नेवासा : नेवासा तालुक्यात बुधवारी (११ जून) रात्री ८ वाजेच्या सुमारास विजेच्या कडकडाटासह वादळी वारा आणि पावसाने जोरदार हजेरी लावली. यामुळे शेती पिकांचे प्रचंड नुकसान झाले, तर सौंदाळा गावाजवळ झाड कोसळल्याने कुकाणा येथील स्वस्त धान्य दुकानदार संघटनेचे जिल्हाध्यक्ष अमोल नवनाथ पंडीत (वय ४२) हे दुचाकीवरून जात असताना त्यांचा मृत्यू झाला. या दुर्दैवी घटनेने परिसरात शोककळा पसरली आहे.

वादळी वाऱ्यामुळे अनेक ठिकाणी झाडे उन्मळून पडली, घरांचे पत्रे उडाले, तर काही ठिकाणी घरे कोसळली. भेंडा, कुकाणा, जेऊर, हैबती, देडगाव, महालक्ष्मी हिवरे आदी गावांत पिकांचे मोठे नुकसान झाले. कुकाणा येथे भाऊसाहेब फोलाणे यांच्या केळीच्या बागेचे नुकसान झाले, तर साठवलेला कांदा भिजल्याने शेतकऱ्यांवर आर्थिक संकट कोसळले. करंजी ते भेंडा उच्चदाब वाहिनीचे चार मनोरे कोसळले, तर एक मनोरा वाकला. गट क्रमांक ४०४ मध्ये लक्ष्मण पेहरे यांची कपाशी, गट क्रमांक ४०५ मध्ये तुकाराम पेहरे यांची तूर, कांदा, कपाशी, गट क्रमांक ६२ मध्ये हरिभाऊ आणि मच्छिंद्र पाडळे यांची तूर, उडीद, कांदा आणि गट क्रमांक ६३ मध्ये सुभाष कोलते यांच्या ऊस पिकांचे नुकसान झाले.

आमदार विठ्ठलराव लंघे-पाटील यांनी तहसीलदार आणि तालुका कृषी अधिकाऱ्यांना तातडीने पंचनामे करून नुकसानग्रस्त शेतकऱ्यांना भरपाई देण्याचे आदेश दिले. या पावसामुळे जीओ, एअरटेल, व्होडाफोन, आयडिया यांचे नेटवर्क ठप्प झाले, तसेच ऑनलाइन व्यवहार आणि संवाद खंडित झाला. अहमदनगर येथील शासकीय रुग्णालयात पंडीत यांचे शवविच्छेदन करून कुकाणा येथे अंत्यसंस्कार करण्यात आले.