नेवासा: भेंडा (ता. नेवासा) येथील राज्यातील पहिल्या २० मेगावॅट सौरऊर्जा प्रकल्पाचे उद्घाटन पंतप्रधान नरेंद्र मोदी यांनी ऑनलाइन पद्धतीने जिल्हाधिकारी कार्यालयात नुकतेच केले. याप्रसंगी आमदार विठ्ठलराव लंघे-पाटील, अधीक्षक अभियंता रमेशकुमार पवार, कार्यकारी अभियंता लक्ष्मण काकडे, उपकार्यकारी अभियंता राहुल बडवे आदी उपस्थित होते. हा राज्यातील पहिला यशस्वी सौरऊर्जा प्रकल्प असून, यामुळे नेवासा तालुक्यातील १२ गावांना २४ तास अखंडित वीजपुरवठा होणार आहे. प्रकल्पातून शेती, घरगुती आणि व्यावसायिक ग्राहकांना स्वस्त वीज उपलब्ध होईल. यात म्हसले येथे १० मेगावॅट, तर रांजणगाव आणि नजीक चिंचोली येथे प्रत्येकी ५ मेगावॅट असे तीन सौरऊर्जा संच बसवले आहेत. दिवसा शेतीच्या पंपांना वीजपुरवठा होईल, तर १२.५ मेगावॅट क्षमतेच्या बॅटरीत साठवलेली वीज रात्री भेंडा, सौंदाळा, म्हसले, रांजणगाव, तरवडी, भानसहिवरा, कारेगाव, खुणेगाव, गेवराई, गोंडेगाव, पिचडगाव आदी गावांना पुरवली जाईल. या प्रकल्पामुळे ७,०३० शेती पंप, ४,६०० घरगुती आणि व्यावसायिक ग्राहकांना फायदा होणार आहे. प्रगत तंत्रज्ञानाचा वापर करून बसवलेल्या सौर पॅनेलमुळे हा प्रकल्प यशस्वी ठरला आहे. आमदार लंघे-पाटील यांनी सांगितले की, या प्रकल्पामुळे नेवासा तालुक्याच्या शिरपेचात देशात मानाचा तुरा रोवला गेला आहे. हा प्रकल्प नेवासा मतदारसंघासाठी अभिमानास्पद असून, शेतकरी आणि नागरिकांना मोठा दिलासा मिळेल.
