Nevasa: नेवासा तालुक्यातील दिघी शिवारात शनिवारी दुपारी आग्या मोहळाच्या हल्ल्यात पोकलेन मालक बाबासाहेब बाळासाहेब चावरे (वय ४३, रा. नेवासा फाटा, ता. नेवासा) यांचा मृत्यू झाला. तर पोकलेन चालकाची (रा. उत्तर प्रदेश) प्रकृती गंभीर असल्याची माहिती आहे. याप्रकरणी नेवासा पोलीस ठाण्यात अकस्मात मृत्यूची नोंद करण्यात आली आहे. नेमके काय घडले ? बाबासाहेब चावरे हे शनिवारी दिघी शिवारात ताकवणे यांच्या शेतात आपल्या पोकलेनद्वारे शेततळे खोदण्याचे काम करत होते. शेततळ्याचे काम आटोपल्यानंतर परिसरातील आंब्याच्या झाडाजवळील खड्डा बुजवण्याचे काम सुरू असताना अचानक त्या आंब्याच्या झाडावरील आग्या मोहळातील माशांनी बाबासाहेब यांच्यावर एकाच वेळी हल्ला चढवला. पोकलेनच्या केबिनमधून बाहेर आलेल्या चालकावरही माशांनी हल्ला केला. जीव वाचवण्यासाठी बाबासाहेब धावत सुटले, मात्र माशांनी पाठलाग करत त्यांना कडाडून चावे घेतले. प्राण वाचवण्याच्या आशेने त्यांनी जवळच असलेल्या शेततळ्यात उडी घेतली. परंतु तळ्यात पाणी कमी असल्याने माशांच्या हल्ल्यापासून सुटण्याचा हा प्रयत्न अखेर अयशस्वी ठरला. काही वेळाने त्यांचा मृतदेह शेततळ्यात आढळून आला. या प्रकरणी नेवासा पोलीस ठाण्यात अकस्मात मृत्यूची नोंद करण्यात आली असून पुढील तपास तपासी अंमलदार संदीप ढाकणे हे करत आहेत.