देशातील तीनही रुग्ण केरळचे असल्याने मुख्यमंत्र्यांचा निर्णय

तिरुवनंतपुरम : कोरोना व्हायरसने चीनमध्ये चांगलाच तांडव निर्माण केला आहे. कोरोना व्हायरसमुळे चीनची चिंता दिवसेंदिवस वाढत आहे. या भयंकर अशा कोरोना व्हायरसचे रुग्ण भारतातही आढळले आहेत. केरळमध्ये तीन जणांना या व्हायरसचा संसर्ग झाल्याचे समोर आले आहे. तीनही रुग्ण केरळचे रहिवासी आहेत, त्यामुळे कोरोना व्हायरसला केरळसमोरील मोठं संकट म्हणून घोषित करण्यात आलं आहे. केरळचे मुख्यमंत्री पिनरई विजयन यांनी ही घोषणा केली आहे.

केरळचे आरोग्यमंत्री के. के. शैलजा यांनी विधानसभेत याविषयी माहिती दिली. रविवारपर्यंत राज्यात 104 नमुन्यांची चाचणी करण्यात आली, ज्यामध्ये तीन जणांना कोरोना व्हायरसची लागण झाल्याचे निष्पन्न झाले आहे. तिन्ही रुग्ण चीनमधून केरळमध्ये परतले होते. वुहानमधील विद्यापीठात शिक्षणासाठी गेलेल्या एका विद्यार्थ्याचा यामध्ये समावेश आहे. या विद्यार्थ्याला कासारगोडमधील कान्हानगड जिल्हा रुग्णालयात ठेवण्यात आले आहे.

इतर दोन रुग्णही चीनच्या वुहान शहरातून भारतात परतले होते. दोघे त्रिशूर आणि अल्पुझा येथील रहिवाशी आहेत. त्यामुळे केरळ सरकारने सर्वांनी खबरदारी घेण्याचे आवाहन केले आहे. केंद्र सरकारनेही कोरोना व्हायरसला रोखण्यासाठी हालचाली सुरु केल्या आहेत. यासंबंधीची पहिली बैठक काल पार पडली. या बैठकीत केंद्रीय आरोग्यमंत्री हर्ष वर्धन, हरदीप पुरी, ए जयशंकर, जी किशन रेड्डी, अश्विन कुमार चौबे हे उपस्थित होते.