ST Mahamandal : राज्यातल्या मराठा आरक्षणामुळे बंद करण्यात आलेली लाल परीची वाहतूक अखेर पूर्ववत करण्यात आली आहे. मनोज जरांगे यांनी अंदोलन मागे घेतल्यानंतर महामंडळाकडून हा निर्णय घेण्यात आला आहे. ऐन दिवाळीच्या (Diwali 2023) तोंडावर प्रवाशांना मोठा दिलासा मिळाला आहे.

एसटीच्या सर्व (ST Mahamandal) आगारातून वाहतूक सुरळीत झाल्या आहेत. मराठा आरक्षण आंदोलनादरम्यान (Maratha Reservation Protest) अनेक ठिकाणी एसटी बसला लक्ष्य करण्यात आले होते. त्यामुळे खबरदारी म्हणून अनेक एसटी फेऱ्या रद्द करण्यात आल्या होत्या. आता राज्यभरात शालेय विद्यार्थ्यांच्या सहामाही परीक्षा सुरु असल्याने शालेय फेऱ्यांना एसटीकडून प्राधान्य देण्यात आले आहे. येत्या 9 नोव्हेंबरपासून एसटीची दिवाळीदरम्यान जादा वाहतूक सुरु होणार आहे.

सणासुदीचा फायदा घेत खासगी बसचालक प्रवाशांकडून ज्यादा भाडे उकळले जाते. दिवाळीमध्ये बसेस अभावी प्रवाशांची होणारी गैरसोय टाळण्यासाठी दरवर्षीप्रमाणे यंदाही एसटीच्या बसेस सोडण्यात येणार आहेत. विविध मार्गांवर या बसेस धावणार असून जादा बसेस 9 नोव्हेंबरपासून सुटणार आहेत.

एसटी महामंडळाच्यावतीने होळी, गणेशोत्सव, दसरा-दिवाळी आदी सण-उत्सवाच्या काळात जादा वाहतूक चालवली जाते. या दरम्यान, एसटीला अधिक उत्पन्न मिळवण्याची संधी असते. दिवाळीच्या सुट्टीत महाविद्यालये व शाळांना सुट्टी असते. त्यामुळे अनेक कुटुंबे मुलांसह गावी, धार्मिक स्थळे किंवा पर्यटनस्थळांना भेटी देण्याचे नियोजन करतात. त्यामुळे दरवर्षी एसटीला या काळात मोठा फायदा होतो.