पुणेः स्वारगेट बलात्कार प्रकरणानंतर एसटी प्रशासन अलर्ट मोडवर आले आहे. या धक्कादायक घटनेनंतर स्वारगेट बसस्थानकातील सुरक्षेचा अभाव समोर आला होता. त्यामुळे आता प्रशासनाकडून विविध उपाययोजना करण्यावर भर देण्यात आला आहे. त्यानुसार पुणे शहर आणि ग्रामीण भागातील संवेदनशील बस थांब्यांसाठी पोलीस प्रशासनाची मदत घेतली जाणार आहे. यासंबंधीचा पत्रव्यवहार एसटी प्रशासनाने पोलिस आयुक्तांना केला असल्याची माहिती आहे.

पुणे, पिंपरी चिंचवड शहरासह ग्रामीण भागातील १४ आगारांतर्गत असणाऱ्या ४२ बस स्थानकांच्या हद्दीतील १०० बसथांबे संवेदनशील थांबे म्हणून निश्चित करण्यात आले आहेत. त्या ठिकाणी प्रतिबंधनात्मक उपायोजना करण्यासाठी पोलिस आयुक्तांना पत्रव्यवहार करण्यात आला आहे. चांदणी चौक, कात्रज, रावेत, चांदणी चौकातील बाह्यवळण ओलांडल्यानंतर महामार्गावरील हिंजवडी फाटयाजवळ मुंबईच्या दिशेने जाणारे आयटी कंपन्यातील प्रवासी कायम असतात. हे प्रवासी रात्री अपरात्री महामार्गांलगत असणाऱ्या एसटी थांब्यावर बस थांबून प्रवास करत असतात. त्यामुळे प्रवाशांच्या सुरक्षतेसाठी एसटी प्रशासनाने हा निर्णय घेतला असल्याचे सांगण्यात आले आहे.

पोलिसांची गस्तही वाढवणार 

पुणे आणि पिंपरी चिंचवड शहरात नोकरी व्यवसाय आणि शिक्षणासाठी मोठ्या संख्येने परगावाहून अनेकजण येत असतात. त्यामुळे मोठ्या संख्येने प्रवासी एसटीने प्रवास करत असतात. त्यानुसार आता महामार्गांवरील थांब्यांवर प्रवाशांच्या सुरक्षिततेसाठी संबंधित ठिकाणी पोलिसांची गस्त वाढविण्यासंदर्भात प्रतिबंधात्मक उपाययोजना करण्यात येणार आहे.