Sonal Dinusha POTM : आयसीसीने सोनल दिनुशाची घेतली दखल! भारताविरुद्धच्या कामगिरीसाठी दिला ‘हा’ खास सन्मान
Sonal Dinusha POTM : सोनल दिनुशाने नुकतेच भारताविरुद्धच्या दोन सामन्यांच्या कसोटी मालिकेत फलंदाजीने शानदार कामगिरी केली.
Sonal Dinusha Wins ICC Mens Player Of The Month For August 2026 Sensational Performance : भारताच्या मजबूत गोलंदाजीचा समाचार घेत कसोटी मालिकेत खोऱ्याने धावा कुटणाऱ्या श्रीलंकेचा युवा फलंदाज सोनल दिनुशाची (Sonal Dinusha) आंतरराष्ट्रीय क्रिकेट परिषदेने (ICC) मोठी दखल घेतली आहे. आयसीसीने १७ सप्टेंबर रोजी ऑगस्ट २०२६ महिन्यासाठीचा मानाचा ‘आयसीसी मेन्स प्लेयर ऑफ द मंथ’ (ICC Men’s Player of the Month) पुरस्कार दिनुशाला जाहीर केला. त्याने इंग्लंडचा वेगवान गोलंदाज ऑली रॉबिन्सन आणि बांगलादेशचा हसन महमूद यांना मागे टाकत कारकिर्दीच्या सुरुवातीलाच हा पुरस्कार जिंकला आहे.
४ डावांत ४२० धावा अन् १४० ची सरासरी; भारताच्या गोलंदाजांची उडवली झोप!
आयसीसी वर्ल्ड टेस्ट चॅम्पियनशिप (WTC) अंतर्गत भारताविरुद्ध झालेल्या दोन कसोटी सामन्यांच्या मालिकेत दिनुशाने स्वप्नवत कामगिरी केली. त्याने अवघ्या ४ डावांत १४० च्या अवाढव्य सरासरीने ४२० धावा कुटल्या, ज्यात ३ शतके आणि १ अर्धशतकाचा समावेश होता. मालिकेपूर्वी केवळ तीन कसोटींचा अनुभव पाठीशी असतानाही तो संपूर्ण मालिकेत सर्वाधिक धावा करणारा फलंदाज ठरला.
गॉलमध्ये शतकी तडाखा, कोलंबोत सलग दोन शतके ठोकून सामना वाचवला!
An inspirational #WTC27 performance earns Sri Lanka all-rounder the ICC Men’s Player of the Month for August honour 🎖️
Read more ➡️ https://t.co/Vb2BVtcRPK pic.twitter.com/yVM69d8lP1
— ICC (@ICC) September 17, 2026
गॉल येथील पहिल्या कसोटीत त्याने पहिल्या डावात १०० आणि दुसऱ्या डावात ८४ धावा केल्या; तरीही लंकेला १६५ धावांनी पराभव पत्करावा लागला. मात्र, २३ ते २७ ऑगस्ट दरम्यान कोलंबोमध्ये खेळल्या गेलेल्या दुसऱ्या कसोटीत त्याने ऐतिहासिक कामगिरी केली. पहिल्या डावात १०३ आणि दुसऱ्या डावात नाबाद १३३ धावांची खेळी करत त्याने एकट्याच्या जोरावर सामना अनिर्णित राखला. या अष्टपैलू खेळीसाठी त्याला ‘प्लेअर ऑफ द मॅच’ देऊन गौरवण्यात आले होते, तरी भारताने ही मालिका १-० ने खिशात घातली.
‘कारकिर्दीच्या सुरुवातीला हा सन्मान मिळणे स्वप्नवत’; दिनुशाने मानले आभार!
हा पुरस्कार मिळाल्यानंतर दिनुशाने आनंद व्यक्त करताना म्हटले की, “भारताविरुद्धची ही मालिका माझ्या हृदयाच्या कायम जवळ राहील. घरच्या मैदानावर भारतासारख्या बलाढ्य संघाविरुद्ध तीन शतके ठोकणे हे स्वप्न पूर्ण झाल्यासारखे आहे. आम्ही मालिका जिंकू शकलो नाही; पण दुसऱ्या कसोटीतील पुनरागमनाने संघाचा आत्मविश्वास वाढवला आहे.”
