Indian Sports Awards : 2023 सालचे भारतीय क्रीडा पुरस्कार जाहीर झाले आहेत. क्रीडा क्षेत्रातील भारतातील सर्वात मोठा पुरस्कार ‘खेलरत्न’साठी दोन बॅडमिंटनपटूंची निवड करण्यात आली आहे. सात्विकसाईराज रंकीरेड्डी आणि चिराग शेट्टी यांना हा मोठा पुरस्कार मिळणार आहे. त्याचबरोबर मोहम्मद शमीला ‘अर्जुन पुरस्कार’ प्रदान करण्यात येणार आहे. यंदाच्या अर्जुन पुरस्कारासाठी निवडलेल्या 26 खेळाडूंच्या यादीत शमीचा समावेश आहे. पॅरा तिरंदाज शीतल देवीचे नावही या यादीत सामील आहे.

सात्विकसाईराज रँकीरेड्डी आणि चिराग शेट्टी यांनी (Satwik Sairaj Rankireddy and Chirag Shetty) यावर्षी बॅडमिंटनच्या क्षेत्रात भारताचा झेंडा जगभर फडकवला होता. या जोडीने हँगझोऊ येथे खेळल्या गेलेल्या आशियाई क्रीडा स्पर्धेत भारताला ऐतिहासिक विजय मिळवून दिला. दुसरीकडे, मोहम्मद शमीने 2023 च्या विश्वचषक स्पर्धेत चमकदार कामगिरी केली होती. या विश्वचषकात सर्वाधिक विकेट घेणारा तो गोलंदाज होता. या दोन मोठ्या भारतीय क्रीडा पुरस्कारांसाठी तिरंदाजी, बॉक्सिंग, कुस्तीपासून पॅरा तिरंदाजी आणि अंध क्रिकेट अशा 19 विविध खेळांमधील एकूण 28 खेळाडूंची नावे अंतिम (निश्चित) करण्यात आले आहेत.

खेलरत्न पुरस्कार : चिराग शेट्टी (बॅडमिंटन) आणि सात्विकसाईराज रँकी रेड्डी (बॅडमिंटन)

अर्जुन पुरस्कार : ओजस प्रवीण देवतळे (तिरंदाजी), आदिती गोपीचंद स्वामी (तिरंदाजी), श्रीशंकर (अ‍ॅथलेटिक्स), पारुल चौधरी (अ‍ॅथलेटिक्स), मोहम्मद हुसामुद्दीन (बॉक्सर), आर वैशाली (बुद्धिबळ), मोहम्मद शमी (क्रिकेट), अनुष अग्रवाल (घोडेस्वारी ), दिव्यकृती सिंग (घोडेस्वारी ड्रेसेज), दीक्षा डागर (गोल्फ), कृष्णा बहादूर पाठक (हॉकी), सुशीला चानू (हॉकी), पवन कुमार (कबड्डी), रितू नेगी (कबड्डी), नसरीन (खो-खो), पिंकी (लॉन बॉल), ऐश्वर्या प्रताप सिंग तोमर (नेमबाजी), ईशा सिंग (नेमबाजी), हरिंदर पाल सिंग (स्क्वॅश), अहिका मुखर्जी (टेबल) टेनिस), सुनील कुमार (कुस्ती), अंतिम (कुस्ती), रोशिबिना देवी (वुशू), शीतल देवी (पॅरा तिरंदाजी), अजय कुमार (ब्लाइंड क्रिकेट), प्राची यादव (पॅरा कॅनोइंग).

IPL 2024 Auction : 39 खेळाडूंवर कोट्यवधींची उधळण! कमिन्स-स्टार्कने मोडले रेकॉर्ड; जाणून घ्या, लिलावातील सर्व घडोमोडी एका क्लिकवर….

पुरस्कार कधी मिळणार?

राष्ट्रपती भवनात राष्ट्रीय क्रीडा पुरस्कारांसाठी एका विशेष कार्यक्रमाचे आयोजन करण्यात आले आहे. यावेळी कार्यक्रम 9 जानेवारी 2024 रोजी नियोजित करण्यात आला आहे. त्यादरम्यान हे क्रीडा पुरस्कार दिले जातील.