Jeetendra : बॅालिवूडमध्ये अनेक दिग्गज कलाकार आहेत. त्यांचा कलाक्षेत्रातील येण्याआधीचा प्रवास थक्क करणारा आहे. त्यापैकी एक आहेत ज्येष्ठ अभिनेते जीतेंद्र. क्लासिक चित्रपटांच्या काळात जीतेंद्र यांनी आपली वेगळी छबी प्रेक्षकांच्या मनात रजवली. त्यांच्या चाहतावर्ग देखील मोठा आहे. जीतेंद्र यांचं वय झालं असलं तरी त्यांचा अभिनय आजही तरुणच वाटतो.

जीतेंद्र फारसे इंडस्ट्रीत कुठे वावरत नसले तरी ते विविध कारणांमुळे नेहमी चर्चेत असतात. या ज्येष्ठ अभिनेत्याच्या स्टार होण्यापूर्वीचा प्रवास अत्यंत खडतर राहिलेला आहे. कधीकाळी गिरगाव येथील चाळीतील १० बाय १० च्या खोलीत राहणाऱ्या या अभिनेत्याचा जुहू परिसरात आलिशान बंगला असून त्याची किंमत तब्बल २०० कोटी असल्याचे सांगितले जाते.

जितेंद्र यांचा जन्म आणि बालपण दक्षिण मुंबईतील गिरगावातील पारंपरिक चाळीत गेले. त्यांनी त्याच चाळीत हलाकीचे दिवस काढून मोठा संघर्ष करत आयुष्य घडवलं. तिथूनच अभिनय क्षेत्रात पाऊल टाकलं आणि पुढे हिंदी चित्रपटसृष्टीतील सुपरस्टार म्हणून नावलौकिक केले.

लग्न, संसार आणि मुलांचं संगोपनही त्यांनी त्याच परिसरात केलं. पण आजही त्यांचं गिरगाव आणि मराठी संस्कृतीशी असलेलं नातं कायम असल्याचं सांगितलं जातं. सध्या जितेंद्र पत्नी शोभा कपूर, मुलगी एकता कपूर आणि नातू रवी यांच्यासह जुहूतील गुलमोहर क्रॉस रोडवरील ‘कृष्णा’ या आलिशान बंगल्यात राहतात.

हेही वाचा :  Asim Munir : “पाण्याच्या प्रत्येक थेंबासाठी…”; भारताच्या निर्णयाने पाकिस्तान हादरला, असिम मुनीर यांची उघड धमकी

‘प्रेम मिलन’ या नावानेही ओळखला जाणारा हा बंगला केवळ त्याच्या भव्यतेमुळेच नव्हे, तर कपूर कुटुंबाच्या अनेक आठवणींचा साक्षीदार म्हणूनही प्रसिद्ध आहे. सुमारे २०० कोटी रुपये किंमतीच्या या बंगल्यात पारंपरिक भारतीय वास्तुकलेची झलक पाहायला मिळते. आकर्षक इंटिरिअर, महागडी चित्रं, कुटुंबातील खास क्षण टिपणारे पोर्ट्रेट्स आणि प्रशस्त सजावट यामुळे हा बंगला विशेष ठरतो.

बॉलिवूडमधील अनेक नामवंत कलाकारांच्या खासगी मेजवान्याही येथे रंगल्या आहेत. या बंगल्याचं आणखी एक वैशिष्ट्य म्हणजे येथील भव्य गणेश मंदिर. जितेंद्र आणि त्यांचं संपूर्ण कुटुंब भगवान गणेशाचे निस्सीम भक्त असल्याने दरवर्षी गणेशोत्सव मोठ्या उत्साहात आणि पारंपरिक पद्धतीने येथे साजरा केला जातो. या सोहळ्याला बॉलिवूडमधील अनेक कलाकार हजेरी लावत असतात.

विशेष म्हणजे, ‘कृष्णा’ बंगल्याशेजारीच एकता कपूर यांच्या मालकीची ‘कृष्णा-1’ आणि तुषार कपूर यांच्या मालकीची ‘कृष्णा-2’ ही आलिशान इमारती आहेत. या दोन्ही ठिकाणी त्यांचे प्रशस्त पेंटहाऊस असून, कपूर कुटुंबाचा हा संपूर्ण परिसर मुंबईतील सर्वात प्रतिष्ठित निवासी ठिकाणांपैकी एक मानला जातो.

हेही वाचा : Kriti Sanon: ‘स्वतःलाच दिलेली सर्वात मोठी भेट’; कृति सेननने ‘एग फ्रीझिंग’चा निर्णय का घेतला? अभिनेत्रीनेच केला खुलासा