प्रभात वृत्तसेवा
पुणे – लडाखमधील सामाजिक कार्यकर्ते आणि शिक्षणतज्ज्ञ सोनम वांगचुक यांना केंंद्र सरकारने केलेल्या अटकेविरोधात शनिवारी पुण्यात निदर्शने करण्यात आली. वांगचुक यांना काही दिवसांपूर्वी राष्ट्रीय सुरक्षा कायद्यान्वये अटक करण्यात आली असून त्यांच्या विरोधात काही गंभीर आरोप करण्यात आले आहेत. मात्र, वांगचुक यांच्यावर झालेले आरोप खोटे असून त्यांचे जाणीवपूर्वक चारित्र्यहनन सुरू आहे, वांगचुक लडाखमधील विनाशकारी विकासाला विरोध करत असल्याने त्यांची व त्यांच्यासोबत अटक झालेल्या सर्व लडाखी कार्यकर्त्यांची ताबडतोब सुटका करावी, अशी मागणी यावेळी करण्यात आली.

२०१९ मध्ये कलम ३७० रद्द झाल्यानंतर लडाखला केंद्रशासित प्रदेश झाला आहे. त्यानंतर सातत्याने लडाखला स्वतंत्र राज्याचा दर्जा दिला जावा आणि त्याचे संविधानाच्या सहाव्या सुचित समावेश करावा, यासाठी वांगचुक यांनी आंदोलन करत होते. काही दिवसांपूर्वी त्यांनी या मागणीसाठी उपोषण पुकारले होते. त्यांच्या उपोषणाकडे सरकारने बऱ्यापैकी कानाडोळा केला होता. त्यानंतर पेटलेल्या आंदोलनात मोठ्या प्रमाणात हिंसाचार झाला. त्यानंतर वांगचुक यांना अटक करत अज्ञात ठिकाणी हलविण्यात आले आहे.

एकीकडे विकासाच्या नावाखाली जमिनी अधिग्रहीत करून जंगले, पाणी व जमीनीवरील लोकांचे हक्क हिरावून देशाची साधन संपत्ती अदानी अंबानीच्या घशात घातली जात आहे आणि सामान्य नागरिकांना देशोधडीला धाडले जात आहे, तर दुसरीकडे धर्म, जाती, जमाती भाषा आदींच्या आधारावर फूट पाडण्याचा उद्योग भाजपकडून केला जात आहे. रोजगार, अन्न, शेतीमालाचा हमीभाव, शिक्षण, आरोग्य सेवा इत्यादीं सारख्या सामान्य माणसाच्या प्रश्‍नांवरून जाणीवपूर्वकरित्या लक्ष हटविले जात आहे.

राजकीय नेत्यांचे हितसंबंध असल्याने पाकिस्तानसोबत क्रिकेट सामना खेळला जात आहे, मात्र, दक्षिण आशियाच्या हवामान बदलावरील परिषदेसाठी पाकिस्तानला गेलेल्या वांगचुक यांना देशद्रोही म्हटले जात आहे, यामागचा विरोधाभास आणि ढोंगीपणा लक्षात घेतला पाहिजे. त्यामुळे या अन्यायाचा आणि सरकारी दडपशाहीचा निषेध करत वांगचुक आणि इतर आंदोलकांच्या तात्काळ सुटकेची मागणी आम्ही करत असल्याचे आंदोलकांनी म्हटले आहे.