नवी दिल्ली : भारतीय जनता पार्टीच्या नेत्या आणि टिकटॉक स्टार सोनाली फोगट यांचे गोव्यामध्ये नुकतेच निधन झाले. त्यानंतर सोनाली फोगट यांच्या मृत्यु प्रकरणी पोलिसांनी हत्येचा गुन्हा दाखल करत त्यांच्या दोन साथीदारांना अटक केली आहे. या घटनेचा तपास सुरू असताना पोलिसांना फोगट यांच्या मृत्यूआधीच्या काही तासांपूर्वीचे सीसीटीव्ही फुटेज मिळाले आहे. हा व्हिडीओ सगळीकडेच व्हायरल झाला. त्यानंतर आता फोगट यांचा आणखी एक व्हिडीओ व्हायरल झाला आहे.

याआधी व्हायरल झालेल्या सीसीटीव्ही फुटेजमध्ये सोनाली फोगट यांना व्यवस्थित चालता येत नसल्याचे दिसत होते. तसेच त्या आरोपी सुधीर सांगवानचा आधार घेऊन चालत असल्याचे सीसीटीव्ही फुटेजमध्ये दिसत होते. आता या नव्या व्हायरल व्हिडीओमध्ये एक वेगळेच चित्र पाहायला मिळत आहे.

क्लबमध्ये पार्टी सुरु असतानाचा हा व्हिडीओ आहे. या व्हिडीओमध्ये सुधीर सांगवान सोनाली यांना काहीतरी पेय बळजबरीने देत असल्याचे दिसत आहे. क्लबमधील हा व्हिडीओ सध्या चर्चेचा विषय ठरत आहे. व्हायरल झालेला हा व्हिडीओ गोव्यामधीलच आहे की नाही हे अजूनही स्पष्ट झालेले नाही. पण व्हिडीओमध्ये दिसणारी व्यक्ती ही सुधीर सांगवान असल्याचे दिसत आहे. निधनापूर्वी सोनाली यांनी आपल्या साथीदारांसह अंजुना बीचवरील कर्लीज रेस्टॉरंटमध्ये पार्टी केली होती.

त्यानंतर तिघेही येथून बाहेर पडले होते. सोनाली फोगट यांना चालता येत नव्हते. त्या आरोपी सुधीर सांगवानची मदत घेत चालत होत्या. त्यांची शुद्ध हरपलेल्या अवस्थेत असल्याचेही सीसीटीव्ही फुटेजमध्ये दिसत होते. या घटनाक्रमानंतर दुसऱ्या दिवशी सकाळी सोनाली फोगट यांना गोव्यातील सेंट अँथनी रूग्णालयामध्ये मृतावस्थेत दाखल करण्यात आले. सुरुवातीला त्यांना हृदयविकाराचा झटका आल्याची माहिती देण्यात आली. पण फोगट यांच्या कुटुंबीयांनी संशय व्यक्त करत सखोल चौकशीची मागणी केली.