कर्जत – आर्थिक परिस्थिती बेताची, मात्र ती परिस्थिती बदलायला भाग पाडून, नव्या उमेदीने नवी स्वप्ने पाहत काहीतरी करून दाखवायचे अशी जिद्द घेऊन व्यवसायात उतरून यशस्वीपणे व्यवसाय चालविणारा युवा उद्योजक म्हणजे शरद गुलाबराव तनपुरे. तनपुरेची ही यशस्वी घोडदौड सर्वांनाच थक्क करणारी आहे.

चिकन, मटणाच्या दुकानात असलेली दुर्गंधी, त्यामध्ये होत असलेली भेसळ, दुकानाजवळ उभे राहवत नव्हते, ही गोष्ट पाहून शरद गुलाबराव तनपुरे यांनी आपणही स्वच्छ वातावरणात भेसळमुक्त व उच्च प्रतीचे चिकन, मटण व मासे ग्राहकांना उपलब्ध करून देऊ शकतो का, असा विचार केला आणि असा व्यवसाय सुरू करण्याचे त्यांनी ठरवलेही. मात्र, मटण, चिकनचा व्यवसाय सुरू करण्याची कल्पना त्यांच्या घरच्यांना पटली नाही. हा किळसवाणा व्यवसाय आहे, आपला व्यवसाय नाही. ठराविक लोक हा व्यवसाय करतात असे म्हणत त्यांना घरून विरोध झाला.

काही मित्रांनी देखील हा व्यवसाय सुरू न करण्याचा सल्ला त्यांना दिला. मात्र, अनेकांचा विरोध झुगारून कर्जत शहरात चॉप्सकट नावाने हायजेनिक चिकन, मटण व फिश मॉल सुरू केला. अनेक लोक त्यांना नावे ठेवत होते. एक मराठी माणूस हा व्यवसाय करू शकत नाही असे म्हणत हसत होते, काहींनी तर वेड्यात काढले. कर्जतमध्ये सुरू केलेल्या चॉप्सकट मॉलमध्ये असलेली स्वच्छता, पारदर्शक व विनम्र सेवा पाहून कर्जतमधील ग्राहकांनी चॉप्सकटला पसंती दिली. एका मराठी माणसाने चिकन, मटण व्यवसाय सुरू केल्याचे पाहून लोक आश्चर्य व्यक्त करत होते.

अनेक चिकन, मटण दुकानांत आपल्याला दुर्गंधीमुळे उभे राहू वाटत नाही. मात्र, चॉप्सकट मॉलवर फॅमिलीसह चिकन, मटन, मासे खरेदीसाठी ग्राहक येत आहेत. असे वातावरण त्या ठिकाणी तयार करण्यात आले आहे. नावे ठेवणारे लोक आता त्यांचे कौतुक करू लागले आहेत. कर्जत तालुक्‍यातील वडगाव तनपुरे येथील शेतकरी कुटुंबात शरद गुलाबराव तनपुरे यांचा जन्म झाला. घरची परिस्थिती बेताचीच. त्यांचे प्राथमिक शिक्षण कर्जत येथील जिल्हा परिषद शाळेत झाले, तर माध्यमिक शिक्षण महात्मा गांधी विद्यालयात झाले.

लवकरच शिक्षण आटोपल्यानंतर त्यांनी कर्जतमध्ये चार वर्षे हॉटेल व्यवसाय केला. मात्र, त्यामध्ये पाहिजे असे उत्पन्न मिळत नव्हते. त्यांनी तो व्यवसाय बंद करण्याचा निर्णय घेतला. दरम्यान, त्यांना अनेक जण म्हणायचे तुझ्याकडे भांडवल नाही. त्यामुळे तू व्यवसाय करू शकत नाही. त्यामुळे पारंपरिक व्यवसाय असलेल्या शेतीकडे वळून भांडवल उभे करावे, असे त्यांना वाटले.

शेती व्यवसाय सुरू करून त्यांनी फळबाग लावली. त्यामध्ये डाळिंबाची निवड केली. परंतु त्यामध्येही त्यांना अनेक अडचणी आल्या. बागेवरील तेल्या रोगाने ते त्रस्त झाले. डाळिंब फळबागेत पाहिजे असे यश त्यांना मिळाले नाही. कष्ट करण्याची जिद्द असलेला हा तरुण कोणतेही काम करण्यासाठी मागे-पुढे पाहत नव्हता, काम छोटे का मोठे हे तो पाहत नव्हता. या दरम्यान फळबागेसाठी घेतलेल्या ट्रॅक्‍टरने गावोगाव जाऊन त्यांनी शेतकऱ्यांचा ऊस बांधणीचे काम केले. त्याचवेळी तनपुरे यांनी पेरूच्या वाणांबद्दल माहिती घेऊन पेरू लागवड करण्याचे ठरवले आणि कष्ट करून पेरूची बाग चांगल्या पद्धतीने उभा केली.

बाग चांगली आल्याने अनेक शेतकरी पेरूची बाग पाहण्यासाठी येत होते. आलेले शेतकरी माहिती घेताना पेरूबाबत माहिती विचारायचे. त्यामध्ये त्यांना व्यवसायाची संधी दिसून आली आणि त्यांनी पेरूची रोपेनिर्मिती करून शेतकऱ्यांसाठी उपलब्ध करण्याचा निर्णय घेतला. दरम्यान, नर्सरी सुरू करून शेतकऱ्यांना विविध फळझाडांची रोपे देऊन त्यांना मार्गदर्शन केले. अल्पावधीत नर्सरीची रोपे महाराष्ट्रासह बाहेर राज्यात जाऊ लागली. तनपुरे यांच्या मार्गदर्शनामुळे अनेक शेतकऱ्यांना लाखो रुपयांचे उत्पन्न मिळू लागले. मात्र, हा युवक एवढ्यावरच थांबणारा नव्हता. अजून नवीन व्यवसाय सुरू करण्याबाबत त्यांची धडपड सुरूच होती. नवीन व्यवसायाबद्दल ते माहिती घेत होते. दरम्यान, चिकन, मटण आणि मासे विक्री व्यवसायातील संधी ओळखून त्यांनी तो व्यवसाय करण्याचा निर्णय घेतला.

तिथूनच साकार होत गेले महाराष्ट्रातील अग्रगण्य अशा चॉप्सकट चिकन, मटण आणि फिश शॉपचे दालन. कर्जत शहरात त्यांनी या व्यवसायाची सुरुवात करत हायजेनिक शॉप उभे केले. त्यामध्ये 19 प्रकारचे नॉनव्हेज, वाट्यावरील मटण, नदीतील जिवंत मासे अशा पद्धतीने सुसज्ज असे परिपूर्ण शॉप तयार केले. पहिल्या आणि मुख्य शाखेला अल्पावधीत प्रचंड प्रसिद्ध प्रतिसाद मिळाला. ग्राहकांचा प्रचंड प्रतिसाद पाहून शरद गुलाबराव तनपुरे यांनी चॉप्सकट व्यवसाय फ्रॅंचायझी पद्धतीने पूर्ण महाराष्ट्रात चालवण्याचा निर्णय घेतला. त्यांच्या या शाखा पद्धतीच्या व्यवसायाला मोठा प्रतिसाद मिळत आहे. फ्रॅंचायझी मॉडेलदेखील यशस्वी ठरले आणि आजपर्यंत महाराष्ट्रात 20 शाखा सुरू असून, दहा शाखांचे काम पूर्णत्वाकडे आहे.

शब्दांकन- योगेश गांगर्डे