Solapur Murder Case : सोलापूर जिल्ह्यातील अक्कलकोट तालुक्यातील इंगळगी गावात मंगळवारी सकाळी धक्कादायक घटना घडली. शेतात असताना जावयाने सासऱ्यावर धारदार शस्त्राने प्राणघातक हल्ला करत त्यांची निर्घृण हत्या केली. या घटनेमुळे परिसरात मोठी खळबळ उडाली आहे. मृत व्यक्तीचे नाव सिकंदर मुलका शेख असे असून, आरोपी जावई सादिक सैफन दफेदार असल्याची प्राथमिक माहिती समोर आली आहे. याबाबत मिळालेल्या माहितीनुसार, सिकंदर शेख हे शेतात काम करत असताना सादिक दफेदार याने अचानक धारदार चाकूने वार केले. या हल्ल्यात सिकंदर शेख यांचा जागीच मृत्यू झाला. सासऱ्यावर वार केल्यानंतर आरोपीने स्वतःवरही वार करून आत्महत्येचा प्रयत्न केला. जखमी अवस्थेत त्याला सोलापूर येथील शासकीय रुग्णालयात दाखल करण्यात आले असून त्याच्यावर उपचार सुरू आहेत. घटनेची माहिती मिळताच वळसंग पोलीस ठाणे येथील अधिकारी तात्काळ घटनास्थळी पोहोचले. पंचनामा करण्याची प्रक्रिया सुरू असून आरोपीविरुद्ध गुन्हा दाखल करण्याचे काम सुरू आहे. जावयाने सासऱ्याचा खून नेमक्या कोणत्या कारणातून केला, याचा तपास पोलिसांकडून सुरू आहे. कुटुंबीयांवर दु:खाचा डोंगर मृत सिकंदर शेख यांचा मुलगा आणि मुलगी पोलीस खात्यात कार्यरत असल्याची माहिती समोर आली आहे. या घटनेमुळे कुटुंबावर दु:खाचा डोंगर कोसळला असून परिसरातील नागरिकांकडून आरोपीवर कठोर कारवाईची मागणी केली जात आहे. या हत्याकांडामुळे वळसंग परिसरात संतापाचे वातावरण निर्माण झाले आहे.
