Anjali Damania : करमाळ्याच्या पोलीस उपअधिक्षक अंजना कृष्णा आणि उपमुख्यमंत्री अजित पवार यांच्यातील संवादाचा व्हिडीओ सोशल मीडियावर व्हायरल झाला होता. या व्हिडीओत कारवाई थांबवा, मी तुम्हाला आदेश देतो असे म्हणत अजित पवार यांनी दादागिरीची भाषा महिला पोलीस अधिकाऱ्याला केल्याने विरोधकांकडून त्यांच्यावर टीका केली जात आहे. अशातच आता सामाजिक कार्यकर्त्या अंजली दमानिया यांनी यावर संताप व्यक्त केला आहे.

करमाळ्यात ऑफिसर आपले काम करत होत्या, तर इतरांच्या सांगण्यावरून त्यांना कॉल करून धमकी देणे एका उपमुख्यमंत्र्यांना शोभतं का? माहिती तरी घेतली का अजित पवारांनी? असे प्रश्न दमानिया यांनी अजित पवारांना विचारले आहेत. “तुझे डेरिंग कसे झाले…. असे त्या बाईंना अजित पवार म्हणाले? इतकी दादागिरी? ह्या बद्दल अजित पवारांनी त्या महिलेची माफी मागितली पाहिजे”, अशी मागणी अंजली दमानिया यांनी केली आहे.

नेमकं काय घडलं होतं?

सोलापूर जिल्ह्यातील कुर्डू गावात अवैध मुरूम उत्खनन सुरू असल्याची तक्रार करण्यात आली होती. या तक्रारीवरून तहसीलदार आणि तलाठी या गावात गेले होते. पण येथील काही लोकांनी अधिकाऱ्यांना दमदाटी केली. याची माहिती मिळताच करमाळ्याच्या पोलीस उपअधीक्षक अंजना कृष्णा त्यांच्या पथकासह घटनस्थळी गेल्या. तिथे गेल्यानंतर अजित पवारांनी त्यांना कारवाई करू नका असा आदेश दिला. या संवादाचा व्हिडीओ सोशल मीडियावर व्हायरल झाला.

त्या ग्रामस्थांवर गुन्हा दाखल 

या प्रकरणी आता कुर्ड गावातील १५ ते २० ग्रामस्थांवर गुन्हा दाखल करण्यात आला आहे. हा प्रकार १ सप्टेंबर २०२५ रोजी दुपारी घडल्याची माहिती आहे. बाबा जगताप, नितीन माळी, संतोष कापरे, अण्णा धाणे यांच्यासह 15 ते 20 ग्रामस्थांचा समावेश आहे. याप्रकरणी, ग्राममहसूल अधिकारी प्रीती शिंदे यांनी तक्रार दिली होती. सरकारी कामात अडथळा निर्माण केल्याप्रकरणी हा गुन्हा दाखल करण्यात आला आहे.

हेही वाचा : चीन-पाकिस्तान संबंधात दरी ; लाखो डॉलर्सच्या प्रकल्पातून ‘ड्रॅगन’ ची अचानक एक्झिट