Six Lane Flyover – मुंबई–बंगळूर महामार्गावरील वाढती वाहतूक कोंडी कमी करण्यासाठी देहूरोड ते सुतारवाडी दरम्यान एलिव्हेटेड कॉरिडॉर उभारण्याच्या प्रकल्पाला विधानसभेत शिक्कामोर्तब मिळाले आहे. सुमारे १५.८७ किलोमीटर लांबीचा सहापदरी उड्डाणपूल प्रस्तावित असून, यामुळे पिंपरी-चिंचवड, हिंजवडी आयटी पार्क आणि पश्चिम पुण्यातील वाहतुकीला मोठा दिलासा मिळणार असल्याची माहिती आमदार शंकर जगताप यांनी दिली. महाराष्ट्राच्या अर्थसंकल्पीय अधिवेशनात नवले उड्डाणपुलाच्या सद्यस्थितीवर प्रश्न उपस्थित करण्यात आला होता. यावेळी आमदार जगताप यांनी देहूरोड ते सुतारवाडी या एलिव्हेटेड कॉरिडॉरबाबत माहिती विचारली. त्यावर उत्तर देताना राज्यमंत्री योगेश कदम यांनी या महत्त्वाकांक्षी प्रकल्पाची रूपरेषा स्पष्ट केली.राष्ट्रीय महामार्ग प्राधिकरणाकडून (NHAI) या प्रकल्पांतर्गत भूसंपादन, सेवा रस्त्यांचे रुंदीकरण आणि डांबरीकरण यांसारख्या कामांना प्राधान्य दिले जाणार आहे. नाशिक फाटा ते खेड या आठ पदरी एलिव्हेटेड मार्गाच्या धर्तीवर हा प्रकल्प साकारण्यात येणार असून, भविष्यातील वाढत्या वाहतुकीचा विचार करून नियोजन करण्यात येत आहे.हिंजवडी आयटी हबसाठी दिलासा , हिंजवडी आयटी पार्क आणि परिसरातील वाहतूक कोंडी दिवसेंदिवस तीव्र होत असताना हा एलिव्हेटेड कॉरिडॉर महत्त्वाचा ठरणार आहे. वाकड, ताथवडे, पुनावळे, रावेत तसेच बालेवाडी, बाणेर, सुस, बावधन या भागांतील प्रवास अधिक गतिमान होणार आहे. याशिवाय माण, मारुंजी, नेरे, जांबे, कासारसाई आणि किवळे येथील नागरिकांनाही या प्रकल्पाचा मोठा लाभ होणार आहे. हा प्रकल्प पूर्ण झाल्यानंतर मुंबई–बंगळूर महामार्गावरील वाहतूक कोंडी मोठ्या प्रमाणात कमी होऊन, प्रवास अधिक वेगवान आणि सुरक्षित होईल, असा विश्वास व्यक्त करण्यात येत आहे.
