SIR Campaign – मतदार याद्यांच्या विशेष सखोल पुनरीक्षण मोहिमेंतर्गत (एसआयआर) जिल्ह्यातील ९० लाख ८० हजार मतदारांपैकी ७५ लाख ८९ हजार मतदारांचे गणना अर्ज जमा झाले आहेत. अद्यापही १५ लाख मतदारांना गणना अर्जांचे वाटप झालेले नाही. त्यापैकी सुमारे ११ लाख मतदारांचे पत्ते सापडत नसल्याने त्यांची नावे वगळण्यासाठी अनुपस्थितीचे पंचनामे निवडणूक आयोगाच्या संकेतस्थळावर टाकले आहेत.

२४ ऑगस्ट रोजी प्रसिद्ध होणाऱ्या प्रारूप मतदार यादीत ही नावे वगळण्यात येणार आहेत, अशी माहिती उपजिल्हा निवडणूक अधिकारी मीनल कळसकर यांनी दिली आहे. केंद्रीय निवडणूक आयोगाच्या निर्देशानुसार मतदार याद्यांचे विशेष सखोल परीक्षण सुरू आहे. त्यासाठी आयोगाने दि. १७ ऑगस्टपर्यंत मुदतवाढ दिली आहे. दाखल अर्जांची ८ हजार ४१७ मतदान केंद्रस्तरीय अधिकारी पडताळणीची प्रक्रिया पूर्ण करत आहेत. आतापर्यंत ६२ लाख ३६ हजार ६७१ अर्ज पडताळणी पूर्ण करून अपलोड केले आहेत.

या मतदारांची नावे प्रारूप मतदार यादीत समाविष्ट केली जातील. अजूनही सुमारे १५ लाख मतदारांचे गणना अर्ज बीएलओंकडे पडून आहेत. त्यात मृत, दुबार आणि अनुपस्थित मतदारांची संख्या जास्त आहे. यातील सुमारे ११ लाख मतदारांच्या अनुपस्थितीचा ३ वेळा पंचनामा केला असून, आयोगाच्या निर्देशानुसार हे पंचनामे संकेतस्थळावर टाकले आहेत. ही संख्या अजून वाढण्याची शक्यता आहे. २४ ऑगस्ट रोजी प्रसिद्ध होणाऱ्या प्रारूप मतदार यादीतून ही नावे वगळण्यात येणार असल्याचे कळसकर यांनी स्पष्ट केले आहे.

प्रारूप यादीनंतरही संधी
जिल्ह्यातील मतदारांची संख्या किमान १२ ते १३ लाखांनी घटण्याची शक्यताही आहे. जिल्ह्यात आतापर्यंत दोन लाख मृत मतदार आढळले आहेत. काही मतदारांनी अद्यापही गणना अर्ज दिलेले नाहीत. त्यांनीही ते परत करावेत, तसेच पडताळणी पूर्ण न केलेल्या मतदारांनी जिल्हाधिकारी कार्यालयाच्या संकेतस्थळावरून आपल्या मतदान केंद्रस्तरीय अधिकाऱ्याचे नाव शोधून त्याच्याशी संपर्क साधावा. त्यांनी २००२ च्या यादीतील माहिती देऊन पडताळणी पूर्ण करावी. प्रारूप मतदार यादी प्रसिद्ध झाल्यानंतरही मतदार यादीत नाव समाविष्ट करता येईल, असेही कळसकर यांनी स्पष्ट केले.