बंगळुरू : कर्नाटकमध्ये सत्तेवर असणाऱ्या कॉंग्रेसने पोटनिवडणुकीला सामोऱ्या गेलेल्या विधानसभेच्या तिन्ही जागा जिंकल्या. त्यामुळे मुडा घोटाळ्यामुळे अडचणीत आलेल्या मुख्यमंत्री सिद्धरामय्या यांना राजकीय जीवदान मिळाल्याचे मानले जात आहे. मैसूर शहर विकास प्राधिकरणाच्या (मुडा) जमीन वाटपात घोटाळा झाला. त्याचा लाभ सिद्धरामय्या यांच्या निकटवर्तीयांना मिळाला, असा आरोप कर्नाटकमधील भाजप आणि जेडीएस या विरोधी पक्षांनी केला. त्या प्रकरणी सिद्धरामय्या यांच्या मागे चौकशीचा ससेमिरा लागला. त्यामुळे विरोधकांनी त्यांच्या राजीनाम्याची मागणी लावून धरली. मात्र, ती फेटाळत काही वावगे केले नसल्याची भूमिका सिद्धरामय्या यांनी सातत्याने मांडली. कॉंग्रेस श्रेष्ठींनीही त्यांना अभय दिल्याचे समोर आले. तसे असले तरी, पोटनिवडणुकीनंतर सिद्धरामय्या पद सोडतील असे भाकीत वारंवार भाजपकडून करण्यात आले. अशात नुकताच पोटनिवडणुकीचा निकाल जाहीर झाला. कॉंग्रेसने तिन्ही जागा जिंकताना भाजप आणि जेडीएसकडून २ जागा खेचून घेतल्या. त्यामुळे केवळ पक्षाचेच नव्हे; तर सिद्धरामय्या यांचे वर्चस्व सिद्ध झाले. पोटनिवडणुकीतील कॉंग्रेसचा विजय सिद्धरामय्या यांचे राजकीय बळ वाढवणारा ठरला आहे. त्यामुळे तूर्त तरी विरोधकांकडून त्यांच्यावर होणाऱ्या टीकेची धार बोथट होणार आहे.
