Shubman Gill Injured ahead IND vs PAK Match : आशिया कप 2025 मधील भारत आणि पाकिस्तान यांच्यातील बहुचर्चित सामन्यापूर्वी भारतीय संघाला मोठा धक्का बसला आहे. स्टार सलामीवीर शुबमन गिलला सराव सत्रादरम्यान हाताला दुखापत झाली आहे. हा सामना आज, 14 सप्टेंबर रोजी दुबई आंतरराष्ट्रीय क्रिकेट स्टेडियमवर खेळला जाणार आहे.

टाइम्स ऑफ इंडियाच्या वृत्तानुसार, शनिवारी भारतीय संघाच्या सराव सत्रादरम्यान शुबमन गिलच्या हाताला चेंडू लागला, ज्यामुळे तो वेदनेने त्रस्त दिसला. यानंतर संघाच्या फिजिओने तातडीने त्याच्याकडे धाव घेतली आणि प्राथमिक उपचारानंतर गिलला मैदानाबाहेर नेण्यात आले. त्यानंतर तो हात धरून दुखावलेल्या अवस्थेत दिसला.

गिल फिजिओच्या देखरेखीखाली –

या घटनेनंतर कर्णधार सूर्यकुमार यादव आणि प्रशिक्षक गौतम गंभीर यांनी गिलशी सविस्तर चर्चा केली. यावेळी गिलचा सलामीचा जोडीदार अभिषेक शर्माने त्याची मदत केली आणि त्याच्यासाठी पाण्याची बाटलीही दिली. फिजिओ सतत गिलच्या प्रकृतीवर लक्ष ठेवून आहे. फिजिओच्या देखरेखीखाली गिल पुन्हा फलंदाजीचा प्रयत्न करत आहे.

हेही वाचा – भारताच्या जास्मिन लंबोरियाने रचला इतिहास; बॉक्सिंग चॅम्पियनशिपमध्ये जिंकलं सुवर्ण

युएईविरुद्ध केली होती दमदार कामगिरी –

शुबमन गिल पाकिस्तानविरुद्धच्या सामन्यासाठी उपलब्ध होणार की नाही, हे अद्याप स्पष्ट झालेले नाही. जर तो पूर्णपणे तंदुरुस्त नसेल, तर हा भारतीय संघासाठी मोठा धक्का ठरेल, कारण गिलने नुकतीच उत्कृष्ट फॉर्म दाखवला आहे. यूएईविरुद्धच्या मागील सामन्यात त्याने नाबाद 20 धावांची खेळी केली होती. जर गिल आज पाकिस्तानविरुद्धच्या सामन्यापूर्वी तंदुरुस्त न झाल्यास, तो कदाचित सामन्याबाहेर राहू शकतो. गिलच्या अनुपस्थितीत संजू सॅमसन सलामीला येऊ शकतो.

हेही वाचा – Asia Cup 2025: जर भारत-पाकिस्तान सामना रद्द झाला तर किती नुकसान होईल? संपूर्ण अहवाल वाचा

संजू सॅमसन देणार सलामी?

गिलच्या अनुपस्थितीत संजू सॅमसन सलामीला येऊ शकतो. सॅमसन हा टी-20 आंतरराष्ट्रीय सामन्यांमध्ये भारताचा प्रमुख यष्टीरक्षक-फलंदाज आहे. केरळच्या या खेळाडूने गेल्या वर्षी टी-20 आंतरराष्ट्रीय सामन्यांमध्ये सलामीवीर म्हणून तीन शतके ठोकली होती. यूएईविरुद्धच्या मागील सामन्यात सॅमसनला मधल्या फळीतील फलंदाज म्हणून प्लेइंग इलेव्हनमध्ये स्थान मिळाले होते, परंतु 58 धावांच्या लक्ष्याचा पाठलाग करताना त्याला फलंदाजीची संधी मिळाली नव्हती.