Shubhanshu Shukla : आंतरराष्ट्रीय अंतराळ स्थानकाला भेट देणारे पहिले भारतीय असलेले ग्रुप कॅप्टन शुभांशू शुक्ला आकाश गंगा नावाच्या यशस्वी मोहिमेनंतर पृथ्वीवर परतण्याची तयारी करत असल्याने भारत आपल्या अंतराळ मोहिमेत एक ऐतिहासिक टप्पा गाठण्यास सज्ज आहे. या ऐतिहासिक क्षणाकडे संपूर्ण जगासह देशाचे लक्ष लागून राहिले आहे.

शुभांशू शुक्ला आणि इतर तीन क्रू मेंबर्सनी २५ जून रोजी फ्लोरिडा येथील केनेडी स्पेस सेंटर येथून उड्डाण केले होते. ते २६ जून रोजी अंतराळ स्थानकावर पोहोचले होते. हे चार अंतराळवीर सोमवार, दि. १४ जुलै रोजी भारतीय वेळेनुसार सायंकाळी ४.३५ वाजता (सकाळी ७.०५ वाजता) आयएसएसवरून बाहेर पडणार आहेत, असे राष्ट्रीय वैमानिकी आणि अंतराळ प्रशासनाने एका निवेदनात म्हटले आहे.

शुभांशू आणि इतर तीन अंतराळवीरांना घेऊन जाणाऱ्या ड्रॅगन अंतराळयानाचे पृथक्करण १४ जुलै २०२५ रोजी भारतीय वेळेनुसार दुपारी ४:३० वाजता होईल. यानंतर, पृथ्वीच्या वरच्या कक्षेत काही हालचाली केल्यानंतर हे अंतराळयान अमेरिकेतील कॅलिफोर्नियाच्या किनाऱ्यावरील प्रशांत महासागरात उतरेल.

पाण्यात उतरल्यानंतर त्यांना सात दिवसांचा पुनर्वसन कार्यक्रम करावा लागेल, जो पृथ्वीच्या गुरुत्वाकर्षणाशी जुळवून घेण्यासाठी अत्यंत महत्त्वाचा आहे. ही मोहीम केवळ वैज्ञानिक संशोधनापुरती मर्यादित नव्हती, तर भारत, पोलंड आणि हंगेरी या देशांसाठी सरकारी सहभाग असलेली पहिली खासगी अंतराळ मोहीम ठरली आहे.

गगनयात्री शुभांशु शुक्ला यांनी भारताच्या अ‍ॅक्सिओम-४ मिशनअंतर्गत 7 मायक्रोग्रॅव्हिटी प्रयोग केले आहेत. यापैकी 4 प्रयोग यशस्वी झाले आहेत. शुभांशू शुक्ला यांनी सूक्ष्म गुरुत्वाकर्षणात मानवी आरोग्य आणि वनस्पतींची वाढ यावर महत्त्वपूर्ण प्रयोग केले. त्यांचे कार्य तरुण वैज्ञानिकांसाठी आणि नव्या पिढीसाठी एक प्रेरणास्त्रोत ठरणार आहे.

दरम्‍यान, इस्रोने शुक्लाच्या आयएसएसच्या प्रवासासाठी सुमारे ५५० कोटी रुपये दिले आहेत. हा अनुभव २०२७ मध्ये अंतराळात जाणाऱ्या मानवी उड्डाण कार्यक्रम गगनयानच्या नियोजन आणि अंमलबजावणीमध्ये फायदेशीर ठरणार आहे, असे इस्रोने म्हटले आहे.