Shrimant Bhausaheb Rangari Ganpati: गणेशोत्सवाच्या उत्साहात पुण्यातील रस्त्यांवर ढोल-ताशांचा गजर आणि गणपती बाप्पाच्या जयघोषाने वातावरण दुमदुमून गेले आहे.

याच पार्श्वभूमीवर भाऊसाहेब रंगारी यांच्या वेशात आलेल्या एका चिमुकल्याने दिलेला संदेश सध्या लक्ष वेधून घेत आहे. ‘आम्ही आस्तिक, ढोल वाजवणारच!’ असे म्हणत या चिमुकल्याने ढोल-ताशांच्या परंपरेबाबत आपली भूमिका मांडली.

पुण्याच्या गणेशोत्सवात ढोल-ताशा, लेझीम आणि पारंपरिक वाद्यांना मोठी ऐतिहासिक आणि सांस्कृतिक परंपरा आहे. त्यामुळे गणेशोत्सवातील वादन आणि ध्वनिप्रदूषणाचा मुद्दा यंदा चांगलाच चर्चेत आला आहे. विशेषतः DJ आणि मोठ्या आवाजातील साउंड सिस्टिमच्या वापरावरून पुण्यात नागरिक, गणेश मंडळे आणि प्रशासन यांच्यात चर्चाही झाली होती.

गणेशोत्सवापूर्वीच पुण्यातील काही नागरिकांनी मोठ्या आवाजातील DJ आणि ध्वनिक्षेपकांवर निर्बंध किंवा बंदीची मागणी केली होती. ध्वनिप्रदूषणामुळे नागरिकांना त्रास होत असल्याचा मुद्दा या मोहिमेतून मांडण्यात आला.

या मागणीला काही गणेश मंडळांनी विरोध दर्शवला, तर काही मंडळांनी DJ आणि इतर साउंड सिस्टिमवर नियम असतील तर ढोल-ताशांनाही समान ध्वनीमर्यादा लागू करावी, अशी भूमिका मांडली.

या वादाच्या पार्श्वभूमीवर पुण्यातील गणेशोत्सवाची पारंपरिक ओळख आणि ध्वनिप्रदूषणाचा प्रश्न पुन्हा एकदा चर्चेत आला आहे. एका बाजूला नागरिकांकडून कर्णकर्कश आवाजावर नियंत्रणाची मागणी होत आहे, तर दुसरीकडे गणेश मंडळांकडून पारंपरिक ढोल-ताशा आणि उत्सवातील वादनावर सरसकट निर्बंध नकोत, अशी भूमिका मांडली जात आहे.

या सगळ्या पार्श्वभूमीवर भाऊसाहेब रंगारींच्या वेशातील चिमुकल्याचा ‘आम्ही आस्तिक, ढोल वाजवणारच!.कारण आवाज ढोलचा असेल पण त्यामागची भावना बाप्पासाठी असेल…! गणपती बाप्पा मोरया ….मंगल मूर्ती मोरया…’ हा संदेश लक्षवेधी ठरत आहे. मात्र, गणेशोत्सवातील पारंपरिक वादन आणि ध्वनिप्रदूषणाच्या मर्यादा यातील समतोलाचा प्रश्न यंदाच्या उत्सवातही चर्चेचा विषय बनला आहे. उत्सवाचा जल्लोष कायम ठेवताना ध्वनीप्रदूषणाच्या नियमांचे पालन कसे केले जाते, याकडे आता पुणेकरांचे लक्ष लागले आहे.